.“Bizim yol” qəzetinin əməkdaşı Ramid İbrahimovun noyabrın 26-da Bakı Şəhər İcra Hakimiyyətinin (BŞİH) əməkdaşı tərəfindən fiziki hücuma məruz qalması ilə əlaqədar Media Hüququ İnstitutu (MHİ) Daxili İşlər Nazirliyinə (DİN), Baş prokurorluğa və Mətbuat Şurasına (MŞ) müraciət edib.
Bu barədə bu gün (03 dekabr) Reportyorların Azadlıq və Təhlükəsizlik İnstitutuna (RATİ) MHİ-dən Ramid İbrahimovun nümayəndəsi Zibeydə Zəkəryayeva məlumat verib.
Z. Zəkəryayeva bildirdi ki, noyabrın 30-da MHİ faktla bağlı yuxarıda adıçəkilən qurumlara şikayət ərizəsi göndərərək, hadisənin araşdırılması və jurnalistə xətər yetirənlərin şəxsiyyətinin müəyyənləşdirilərək, barələrində müvafiq ölçü götürülməsini istəyib.
Xatırladaq ki, “Bizim yol” qəzetinin əməkdaşı Ramid İbrahimov noyabrın 26-da “Qış parkı” layihəsi əsasında Bakı şəhəri, Əlimərdan bəy Topçubaşov küçəsi 73 ünvanında evlərin sökülməsi ilə əlaqədar foto çəkiliş apararkən, BŞİH –nin əməkdaşlarının fiziki hücumuna məruz qalmışdı və nəticədə jurnalistin fotoaparatı sındırılmışdır.
Qeyd edək ki, “Bizim yol” qəzeti 2003-cü ildən çap olunur və gündəlik qəzet kimi fəaliyyət göstərir.