“Monitor” jurnalının qətlə yetirilmiş baş redaktoru, mərhum jurnalist Elmar Hüseynovun hazırda Norveçdə mühacirətdə olan həyat yoldaşı Rüşaniyyə Hüseynova jurnalistin qətlinin üstünün açılmamağına görə Avropa İnsan Haqları Məhkəməsinə şikayət verib. Bu barədə “Turan” informasiya agentliyinə müsahibəsində Rüşaniyyə Hüseynova bildirib.
Ruşanə Hüseynova ona istintaqın gedişi haqqında da məlumat verilmədiyini deyib. O, Avropa Məhkəməsindən Elmar Hüseynovun qətlinin Avropa İnsan Haqları Konvensiyasının “yaşamaq, azad fikri ifadə etmək, effektiv məhkəmə müdafiəsi hüquqlarına malik olmaq” prinsiplərinə zidd olduğunu təsdiq edilməsi barədə qərar verməyi xahiş edib.
Xatırladaq ki, “Monitor” jurnalının baş redaktoru Elmar Hüseynov 2005-ci ilin mart ayının 2-də axşam saat 20 radələrində yaşadığı mənzilin qarşısında odlu silahla (7 güllə) qətlə yetirilib. Ölüm faktı ilə bağlı cinayət işi açılsa da, hələ də bu cinayətin üstü açılmamış, qətlin sifarişçiləri və icraçıları tapılmamışdır.