Bu gün (26 avqust) Səbayel Rayon Məhkəməsinin hakimi Kəmalə Əmirxanovanın sədrliyi ilə regional radionun açılması üçün lisenziya verməkdən imtina etmiş Milli Televiziya və Radio Şurasına (MTRŞ) qarşı iddia üzrə keçirilən proses yekunlaşıb.
Hakim keçən məhkəmə prosesində iddiaçılar – “Televiziya və Alternativ Media İnkişaf Mərkəzi”nin həmtəsisçisi Rəsul Cəfərov və “Mühakimə” qəzetinin baş redaktoru Yaşar Ağazadə tərəfindən verilən vəsatətin təmin edilmədiyini elan etdi. İddiaçılar “Televiziya və radio yayımı haqqında” Qanunun 16-cı maddəsinin şərh edilməsi üçün məhkəmə tərəfindən Konstitusiya Məhkəməsinə sorğunun göndərilməsi ilə bağlı vəsatət vermişdilər.
Tərəflərin başqa vəsatətləri olmadığından onlar son çıxışlarını etdilər. İddialarını müdafiə edən Cəfərov və Ağazadə iddialarının tam şəkildə əsaslandırıldığını, MTRŞ-nın lisenziya verməkdən imtina etməsini onun inhisarçı qurum kimi çıxış etdiyini və bu işin Avropa Məhkəməsində onların xeyrinə həll ediləcəyinə əmin olduqlarını bildirdilər.
MTRŞ-nın nümayəndəsi Toğrul Məmmədov isə iddianı əsassız hesab etdiyini, lisenziyaların verilməsi hüququnun onlara məxsus olduğunu bildirərək, hakimdən iddianın təmin olunmamasını xahiş etdi.
Hakim uzun sürən müşavirədən sonra iddianın təmin edilməməsi ilə bağlı qəbul etdiyi qərar elan etdi.
İddiaçıların RATİ-yə verdiyi məlumata görə, qərardan apellyasiya şikayəti veriləcək.
Qeyd edək ki, iddiaçılar Bakı və Abşeron yarımadasında yayımlanacaq radionun müvafiq tezlikdə fəaliyyətə başlaması üçün lisenziya almaq məqsədilə MTRŞ-ya müraciət ediblər. MTRŞ kifayət qədər boş qalmış tezliyin olduğunu bildirsə də, tezlik ayırmaqdan və lisenziya verməkdən imtina etmişdir. İddiaçılar MTRŞ-nın hərəkətindən şikayət verərək dövlət qurumunun hərəkətinin qanunsuz hesab edilməsini və iddiaçılara lisenziya verilməsinin bu quruma həvalə olunmasını xahiş edirlər.