Reportyorların Azadlıq və Təhlükəsizlik İnstitutu (RATİ) 10 dekabr Beynəlxalq İnsan Haqları Günündə Azərbaycanda söz azadlığı, insan hüquq və azadlıqları sahəsində durumun kəskin vəziyyətə olmağını və Beynəlxalq İnsan Haqları Gününə Azərbaycan hökumətinin biganə qalmağını pisləyir.
RATİ dərin təəssüf hissi ilə qeyd edir ki, beynəlxalq hesabatlarda insan haqlarının pozulmasına gorə ön sıralarda olan Azərbaycanda hakimiyyət bu dəfə də 10 dekabra məhəl qoymadı. Bu günə nə hökümət rəhbərliyi səviyyəsində münasibət bildirildi, nə də həbsdə olan vicdan məhbusları, o cümlədən jurnalist Eynulla Fətullayev həbsdən azad edilmədi.
Belə ki, “Gündəlik Azərbaycan” və “Realniy Azerbaydjan” qəzetlərinin baş redaktoru Eynulla Fətullayev beynəlxalq və yerli ictimaiyyətin israrlı çağırışlarına, Avropa İnsan Hüquqları Məhkəməsinin onun dərhal azad olunmağına dair çıxardığı qərara baxmayaraq hələ də həbsxanadadır.
RATİ həmçinin bəyan edir ki, 2009 ilin əvvəlindən hakimiyyət Azadlıq Radiosu, BBC, Amerikanın Səsi radiostansiyalarının milli FM tezlikdə yayımını dayandırılıb və faktiki olaraq Azərbaycan əhalisini elektron informasiya vasitələrindən düzgün informasiya əldə etmək hüququndan mərhum edib.
Hakimiyyəti kəskin tənqidi məqalələri ilə qınağa çəkən “Monitor” jurnalının baş redaktoru Elmar Hüseynovun qətlindən beş ildən artıq vaxt keçsə də, bu günə kimi bu qətlin icraçıları və sifarişçiləri cinayət məsuliyyətinə cəlb olunmayıblar. İfadə azadlığına görə məhkum olunan “Talişi Sədo” qəzetinin baş reaktoru həbsxanada dünyasını müəmmalı şəkildə dəyişsə də, bu ölümə görə də günahkar olan şəxslər müəyyənləşdirilməyib. Bu ölüm onu göstərdi ki, həbsxanada saxlanılan jurnalistlərin həyati hər an təhlükə ilə üz-üzədir. Həbsxanada saxlanılan zaman Eynulla Fətullayevin paltarlarına narkotiklərin yerləşdirilməsi onu göstərir ki, jurnalisti həbsxanada ölüm təhlükəsi ilə yanaşı növbəti saxta cinayətlərdə ittiham etmə təhlükəsi də gözləyir.
RATİ qeyd edir ki, 2005-ci parlament seçkiləri ərəfəsində və bu seçkilərdən sonra həbs edilən bir neçə vicdan məhbusu hələ də həbsdədir. Habelə Bakı şəhərində Füzuli küçəsində “Qış parkı”nın salınmağı üçün əhalinin mülklərinin zorla əllərindən alınaraq sökülməsi Azərbaycanda insanların yalnız, ifadə, sərbəst toplaşmaq, siyasi azadlıqlardan başqa mülkiyyət, işıq, qaz, su və sair sosial hüquqları da mütəmadi olaraq pozulur.
RATİ Azərbaycan hökumətinə üz tutaraq insan hüquqları əleyhinə yönələn addımlara son qoymağa, həbsdə olan vicdan məhbuslarını və xüsusi olaraq jurnalist Eynulla Fətullayevi dərhal azad etməyə, Elmar Hüseynovun qatillərini və sifarişçiləri cinayət məsuliyyətinə cəlb etməyə, defamasiya haqqında qanun qəbul etməyə, yeni televiziya və radioların açılması üçün mütəmadi və şəffaf tenderlər keçirməyə, xarici radioların yeli tezliklərdə yayımına icazə verməyə, ölkədə media sahəsini tənzimləyən bir çox mürtəce qanunları liberallaşdırmağa, sərbəst toplaşmaq, siyasi və mülki azadlıqları təmin etməyə çağırır.