Səxavət Əliyevin yaxınları Naxçıvanın Bakı nümayəndəliyinin qanunsuz olaraq sökülən dükanın qeyri-qanuni fəaliyyət göstərməsi ilə bağlı açıqlamasını da təkzib ediblər. Onların sözlərinə görə həyətlərinin daxilində olan bu dükan 2004-cü ildə alınan şəhadətnamə əsasında fəaliyyət göstərib və sonuncu dəfə noyabrın sonlarında dükan sahibi tərəfindən vergilər ödənilib. Onlar şəhadətnaməni və ödənilmiş qəbzləri hüquq müdafiəçilərinə göstəriblər.
Habelə dünən axşam saatlarında Səxavət Əliyevin bacısı oğlu Zakir Tağıyev Şərur rayon Polis Şöbəsinə aparılıb və ona xəbərdarlıq edib: “Dedilər ki, get dayın Çapaya de ki, özünü artistliyə vurmasın, gəlib dükandan götürülən mallarını aparsın. Səxavətə isə de ki, o qəzetlərə nə qədər müsahibə verə də faydası yoxdur, onsuz da onu həbs edəcəyik”.
Qeyd edək ki, hadisənin baş verdiyi Püsyan kəndində vəziyyət ağır olaraq qalır. Kənddə hələdə polis nəzarəti var. Çapay Əlisoyun, bacısı Rəxşəndə Tağıyevanın və əmisi qızı Gülarə Əliyevanın vəziyyəti ağır olaraq qalır. Onların vəziyyəti ilə maraqlanan olmayıb və heç bir tibbi yardım göstərilməyib.
Xadırladaq ki, 7 noyabr parlament seçkilərində və bu seçkilərdən sonra 2 saylı Şərur Dairə Seçki Komissiyasından (DSK) “AXCP-Müsavat” blokunun vahid namizədi olmuş Səxavət Əliyevin qohumlarına qarşı da təzyiqlər olub. Namizədin qardaşı Sabit Əliyev Püsyan kənd icra nümayəndəsi də başda olmaqla bir neçə məmur tərəfindən təxribata çəkilib. Noyabrın 12-i o, heç bir əsas olmadan Şərur rayon Polis Şöbəsinə aparılıb. Şikayətçilər iddia edirlər ki, güya Sabit Əliyev kəndin icra nümayəndəsi Amili Əbilov, Püsyan kənd orta məktəbinin direktor əvəzi Asəmin Mahmudovu və kəndin mollası Yasin Əliyevi təhqir edib. Günahlandırılan Sabit Əliyev isə deyilənləri təkzib edib. Bildirib ki, onun şikayət yazanlara qarşı heç bir qərəzi olmayıb. Sadəcə hər kəsin qarşısında seçkilərin saxtalaşdırılmasını və səslərin oğurlanmasını bildirib. Nəticədə o, məhkəmənin hökmü olmadan 7 gün Şərur rayon Polis Şöbəsində saxlanılıb.
10 dekabrda Səxavət Əliyevin qardaşı Çapay Əlisoyun evinə polis basqın edib. Onun həyətində olan kiçik dükanı və dükana bitişik olduğu uçün evinin bir hissəsi traktorla dağıdılıb. Ç.Əlisoy, bacısı Rəxşəndə Tağıyeva, əmisi qızları Gülarə və Balaxanım Əliyevalar, bacılarından Rəxşəndə Tağıyevanın həyat yoldaşı Bayram Tağıyev, bacıoğlusu Zakir Babayev polislər tərəfindən qəddarlıqla döyülüblər. Basqına rəhbərliyi Şərur rayon Polis İdarəsinin rəisi Məmməd Hüseynov və İbadullah Polis Bölməsinin rəisi Əhməd Təhməzov edib. Baş nahiyəsindən aldığı güclü zərbələr nəticəsində Çapay Əlisoyun vəziyyəti ağırlaşıb. Püsyan kəndində yerləşən tibb məntəqəsinin həkimi Aydın Əliyev tibbi yardım göstərməyə gəlsə də, xəstənin vəziyyəti ağır olduğu üçün ona heç cür yardım edə bilməyəcəyini deyib. Onun təcili olaraq xəstəxanaya çatdırılmasını məsləhət bilib. Təcilli tibbi yardım mərkəzindən isə maşınlarının olmamasını bəhanə edərək hadisə zamanı xəsarət alanlara tibbi yardım göstərməkdən imtina edilib.