”Azərbaycan Jurnalistlər Birliyinin” sədri Elçin Şıxlinskiy bildirib ki, azad fikir olmadan azad insan da ola bilməz, bunsuz isə azad cəmiyyət mümkün deyil.
Bir sıra beynəlxalq təşkilatların rəhbərləri: BMT-nin ifadə və informasiya azadlığı üzrə xüsusi məruzəçisi Frank La Rua, habelə ATƏT-in media azadlığı üzrə keçmiş xüsusi nümayəndəsi Mikloş Haraşti forum iştirakçılarını videomüraciətlə salamlayıb. Onlar böhtana görə cinayət məsuliyyətini ləğv etməyə, jurnalist Eynulla Fətullayev və blogerlər – Emin Milli və Adnan Hacızadəni həbsdən azad etməyə çağırıblar.
«Artikl 19» təşkilatının direktoru Anyess Kalamar Azərbaycanda söz və ifadə azadlığının durumunu «çıxılmaz» adlandırıb. “Çünki ölkə hakimiyyəti vəziyyətin dəyişməsini istəmir. Dünya ictimaiyyəti buna göz yummamalı və öz hökumətlərindən Azərbaycanda azadlıqların pozulması məsələsini qaldırmağı tələb etməlidir”, – deyə o vurğulayıb.
“Turan” İnformasiya Agentliyinin direktoru Mehman Əliyev problemlərin həlli üçün kompleks tədbirlər görülməsi zərurətini qeyd edib. Bu tədbirlər sırasında o, diffamasiya haqqında qanunun qəbulunu, peşə etikası normalarına daha çox riayət olunmasını, mətbuatın iqtisadi asılılığının azaldılmasını, təhsil səviyyəsinin yüksəldilməsini və müasir jurnalistika məktəbinin yaradılmasını, sosial jurnalistikanın dəstəklənməsini qeyd edib.
Forum həmçinin jurnalist Eynulla Fətullayev, blogerlər Emin Milli və Adnan Hacızadənin həbsdən dərhal azad edilməsi çağırışı ilə hakimiyyətə müraciət etmək qərarı qəbul edib.