Həbsdəki jurnalistin səhhətində problemlər yaranıb

January 30th, 2014

398327_525389854153700_112437647_n

Yanvarın 28-də vəkil Elçin Sadıqov Milli Təhlükəsizlik Nazirliyinin (MTN) istintaq təcridxanasında saxlanılan “Bizim Yol” qəzetinin əməkdaşı və moderator.az saytının rəhbəri Pərviz Həşimli ilə görüşüb. Bu barədə bu gün (29 yanvar) Reportyorların Azadlıq və Təhlükəsizlik İnstitutuna (RATİ) vəkil Elçin Sadıqov məlumat verib.

Vəkilin verdiyi məlumata əsasən  Pərviz Həşimli özünü yaxşı hiss etmir, gözündən və ürəyindəki ağrılarından şikayətlənib.

“ Onun şikayəti gözündən və ürəyindən olsada yalnız onun gözünü müayinə ediblər. Bundan başqa P.Həşimli saxlanma şəraitindən, ailəsi ilə görüşə icazə verilməməsindən, mətbuatdan məlumatların almasına şəraitin yaradılmamasından şikayətlənib və  bütün bunlar da onun  səhhətinə pis təsir edir”,-deyə vəkil əlavə edib.

Xatırladaq ki,  Pərviz  Həşimli sentyabrın 17-də Milli Təhlükəsizlik Nazirliyinin (MTN) keçirdiyi əməliyyat nəticəsində saxlanılıb. MTN-nin  İstintaq Baş İdarəsi ona qarşı Cinayət Məcəlləsinin 206.3.2-ci (qabaqcadan əlbir olan bir qrup şəxs tərəfindən odlu silahın və döyüş sursatının qaçaqmalçılığı) və 228.2.1-ci (qabaqcadan əlbir olan bir qrup şəxs tərəfindən qanunsuz olaraq odlu silah, onun komplekt hissələrini və döyüş sursatını əldə etmə, saxlama, daşıma) maddələri ilə cinayət işinə başlayıb. Sentyabrın 18-də Səbail rayon Məhkəməsi   Pərviz Həşimli  barəsində 2 aylıq  həbs qətimkan tədbiri seçib. Səbail Rayon Məhkəməsi noyabrın 7-də həbs müddətinin  daha 3 ay uzadılması barədə qərar verib.