Ötən həftə sonu bir qrup ABŞ senatoru Senata doktor Qubad İbadoğlunun Azərbaycan həbsxanasından dərhal azad olunması çağırışı ilə yeni qətnamə təqdim edib, xəbəri Turan-ın Vaşinqtondakı müxbiri verib.
Bu addım fevralın 14-də Konqresin öz bu günə qədər 26 konqresmen tərəfindən dəstəklənmiş “İbadoğlu qətnaməsi” versiyasını yaymasından sonra atılıb.
Senatın “Qətnamə 616” adlanan versiyası martın 22-də senator Tom Tillis (Şimali Karolinadan respublikaçı) tərəfindən öz adından və Dik Durbin (İllinoysdan demokrat), Bill Kessidi (Los-Ancelesdən respublikaçı), Tim Keyn (Virciniya ştatından demokrat) və Con Fetterman (Pensilvaniya ştatından demokrat) kimi senatorların adından təqdim edilib.
Qətnamə Senatın beynəlxalq münasibətlər komitəsinə təqdim edilib, burada baxılması gözlənilir.
Tillisin sözlərinə görə, hörmətli alim və iqtisadçı Qubad İbadoğluna qarşı “Azərbaycan hakimiyyəti tərəfindən yalan, heç bir dəlili olmayan çox sayda cinayət əməli ittihamı irəli sürülüb” və o, indiyədək Bakı İstintaq Təcridxanasında həddindən artıq pis şəraitdə saxlanılır və məhkəməni gözləyir.
“Doktor İbadoğlunun səhhəti həbs edildikdən sonra xeyli pisləşib və o, adekvat tibbi yardım almayıb”, deyə senatorlar qeyd edirlər. Həbs dövründə o, “vəkillə əlaqə saxlamaq və ədalətli məhkəmə təhqiqatı imkanından məhrum edilib”, deyə müəlliflər qeyd edir.
“Dövlət Departamenti və ABŞ-ın Bakıdakı Səfirliyi, habelə ABŞ-ın akademik müəssisələri və hörmətli beynəlxalq təşkilatlar doktor İbadoğlunun səhhəti ilə bağlı dərin narahatlıqlarını bildiriblər və onun dərhal azad edilməsini tələb ediblər”, deyə qətnamədə bildirilir.
Müəlliflər vurğulayırlar ki, insan hüquqları, jurnalistika ilə məşğul olan və fikri dinc şəkildə ifadə edən şəxslərin, o cümlədən Bəxtiyar Hacıyev, Əvəz Zeynallı və digərlərinin qanunsuz həbsləri Azərbaycanın demokratik ölkələr birliyi ilə əlaqələrinə xələl gətirib.
Senatorlar qanunsuz həbslərə və azadlıqların boğulmasına görə Azərbaycan hökumətini qınayır və Azərbaycanda siyasi məhbusları, o cümlədən doktor İbadoğlunu dərhal və qeyd-şərtsiz azad etməyə çağırırlar.
Qətnamədə həmçinin dövlət katibi Azərbaycan hökuməti ilə əlaqələrində doktor İbadoğlunun rifahına və azad edilməsinə üstün diqqət yetirməkdə davam etməyə çağırılır.