İyunun 24-də Bakı Apellyasiya Məhkəməsində “Abzas Media-nın işi” üzrə həbs olunmuş jurnalist Nərgiz Absalamovanın ilkin həbs müddətinin uzadılmasından verilmiş şikayətə baxılıb.
Vəkil Rövşanə Rəhimovanın Turan-a verdiyi məlumata görə, məhkəmə şikayəti təmin etməyib, Xətai Rayon Məhkəməsinin jurnalistin həbs müddətinin 3 ay uzadılması haqqında 11 iyun tarixli qərarını qüvvədə saxlayıb.
Vəkil məhkəmənin qərarını qanunsuz və əsassız hesab edir.
* 2023-cü il noyabrın 20-dən etibarən Abzas Media nəşrinin altı jurnalisti və mətbuat işçisi “valyuta qaçaqmalçılığı” ittihamı ilə həbs olunub. Onlar ittihamları qəbul etməyiblər, cinayət işini Abzas Media-da dərc olunan korrupsiya araşdırmaları ilə əlaqələdiriblər.
Beynəlxalq KİV-i müdafiə təşkilatları Azərbaycan hakimiyyətini həbs olunan jurnalistləri dərhal azad etməyə və KİV-ə qarşı təzyiqə son qoymağa çağırıb.
