“Riyad” Mühafizə Xidmətinin rəis müavini İlqar Rzayev “Milaz” İnformasiya Agentliyinin baş direktoru, “Ayna” və “Zerkalo” qəzetlərinin əməkdaşı Cəsur Sümərinlini (Məmmədov) hədələyib. Bunu bu gün (14 sentyabr ) Reportyorların Azadlıq və Təhlükəsizlik İnstitutuna (RATİ) Cəsur Sümərinlinin özü bildirib.
O bildirdi ki, onun dayısı oğlu Elnur Tağıyev işlə bağlı “Riyad ” mühafizə xidmətinə müraciət edib. “Lakin qohumuma bildiriblər ki, şəxsiyyət vəsiqəni saxla, biz sənlə əlaqə saxlayacağıq. Dəfələrlə şəxsiyyət vəsiqəsi üçün müraciət edilməsinə baxmayaraq Elnur Tağıyevə şəxsiyyət vəsiqəsi qaytarılmayıb. Bununla bağlı olaraq mən “Riyad” mühafizə xidmətinə getdim, lakin heç kimi tapa bilmədim və mənə bildirdilər ki, İlqar müəllimə zəng edim. Mən İlqar müəllimə ilk dəfə zəng edəndə o mənə dedi ki, gəlin ofisə məsələni orda həll edək. Lakin işlərimlə bağlı olaraq gedə bilmədiyimdən şəhərdə olanda İlqar Rzayevə zəng vurdum və xahiş etdim ki, sənədi bir şəxslə mənə göndərsin. Amma o bildirdi ki, sənədi yalnız ofisdə verə bilər və sonra o məni təhqir etməyə və hədələməyə başladı”, – deyə C. Sümərinli əlavə etdi.
C. Sümərinli bildirdi ki, hadisə ilə bağlı olaraq Daxili İşlər Naziri Ramil Usubova online müraciət edib və sabah da ona məktub göndərəcək.
Məsələ ilə bağlı olaraq “Riyad ” mühafizə xidmətinin rəis müavini İlqar Rzayevlə əlaqə saxladıq. İlqar Rzayev jurnalisti təhqir etmədiyini və hədələmədiyini, ancaq jurnalistin onunla kobud danışdığını iddia etdi. Rəis müavini sənəd məsələsini araşdıracağını və məsələni müsbət həll edəcəyini də qeyd etdi.