Bu gün (28 yanvar) Yasamal rayon Məhkəməsində hakim Mətanət Hacıyevanın sədrliyi ilə Yasamal rayon Polis İdarəsinin istintaq şöbəsində "xuliqanlıq" maddəsi ilə aparılmış cinayət işinə əsasən, "Korrupsiya və Cəmiyyət" jurnalının baş redaktorunun müavini Mübariz Məsimoğluna qarşı məhkəmə prosesi keçirilmədi.
Zərərçəkən şəxslər və ittiham olunan tərəfin vəkili iştirak etmədiyinə görə, hakim məhkəmə prosesini 30 yanvar saat 16:00-a təxirə saldı.
Xatırladaq ki, 2008-ci ilin avqust ayında marşrut avtobusda "Korrupsiya və Cəmiyyət" jurnalının baş redaktorunun müavini Mübariz Məsimoğlu ilə Məleykə Əsədova və Emil Carçıyev arasında mübahisə yaranıb və insidentlə bağlı Yasamal rayon Polis İdarəsinin istintaq şöbəsində Mübariz Məsimoğluna qarşı "xuliqanlıq" maddəsi ilə cinayət işi qaldırılıb. Mübariz Məsimoğlu isə Yasamal rayon Polis İdarəsinin rəisi Möhübbət Hüseynovun sifarişi əsasında qaldırıldığını iddia edir və istintaqın nə vaxt aparılmasından və işin məhkəməyə göndərilməsindən xəbərsiz olduğunu bildirir.