Bu gün (02 avqust) “Azadlıq” qəzetinin əməkdaşları «Azərbaycan» Nəşriyyatına buraxılmayıblar. Bu barədə Reportyorların Azadlıq və Təhlükəsizlik İnstitutuna (RATİ) qəzetin baş redaktoru Qənimət Zahid məlumat verib.
Onun sözlərinə görə, əməkdaşları içəri buraxmayan nəşriyyatın mühafizəçiləri buna səbəb kimi qəzetin nəşriyyata borcunun ödənilməməsini göstəriblər. Baş redaktor əlavə etdi ki, göstəriş nəşriyyatın direktoru Ağabəy Əsgərov tərəfindən verildiyinə görə, onunla görüşməyə cəhd göstərsə də, o, katibəsi vasitəsilə vaxtı olmadığını deyib. ““Azadlıq” qəzetinin nəşriyyata 15 min manat borcu var. Mətbuatın 135 illik yubileyi ilə bağlı qəzetə 20 min manat yardım ayrıldığını eşidən kimi belə bir addım atıblar ki, o pulu əlimizdən alsınlar. Mən həmin yardımla borcumu qaytarmağa etiraz etmirəm. Amma hələ o pul bizə çatmayıb” – deyən Qənimət Zahidov əlavə etdi ki, prezidentə müraciət edərək, qəzetə ayrılan yardımın Ağabəy Əsgərovun hesabına köçürülməsini istəyəcək.
Məsələ ilə bağlı “Azərbaycan” nəşriyyatı ilə əlaqə saxlasaq da, rəhbərlikdən heç kimlə danışmaq mümkün olmadı.
Qeyd edək ki, “Azadlıq” qəzeti 1989-cu ildən fəaliyyət göstərir və gündəlik çap olunur.