“Azərbaycanda ictimai-siyasi vəziyyət azad və ədalətli parlament seçkilərinin keçirilməsinə xidmət etmir”. Bu Seçkilərin Monitorinqi və Demokratiyanın Tədrisi Mərkəzinin sentyabrın 2-də açıqladığı hesabatda deyilir.
“Təəssüf ki, seçkiqabağı demokratik atmosfer haqqında danışmağa dəyməz. Bu ilin aprelindən Bakıda keçirilən 9 etiraz aksiyası dağıdılıb. Onların iştirakçılarının bir çoxu inzibati həbslərə və fiziki təzyiqlərə məruz qalıb. Toplaşma azadlığı yalnız küçə aksiyaları zamanı deyil, həm də vətəndaş cəmiyyəti tərəfindən qapalı yerlərdə keçirilən tədbirlər zamanı məhdudlaşdırılır. Belə ki, Gəncə, Yevlax, Naxçıvan, Şəki, Mingəçevirdə bəzi QHT-lərin tədbirləri bu səbəbdən baş tutmayıb”, – deyə Seçkilərin Monitorinqi və Demokratiyanın Tədrisi Mərkəzinin rəhbəri Anar Məmmədli hesabatın təqdimatı amanı bildirib.
O, ölkədə söz və fikir azadlığı ilə bağlı da ciddi problemlərin olduğunu, əsasən telekanallarda siyasi plüralizmin olmadığını deyib. “Jurnalist Eynulla Fətullayevin, blogerlər Emin Milli və Adnan Hacızadənin həbxsanada saxlanması seçkiqabağı durumun demokratikləşməsinə və seçki prosesinə siyasi inamın artırlımasına xidmət etmir”, – deyə Məmmədli vurğulayıb.