May ayının 22-də Xəzər Universitetində Hüquq Maarifçiliyi Cəmiyyəti, Almaniyanın EED Təşkilatı, Amerika Hüquqşünaslar Assosasiyasının Bakı Ofisi və ABŞ-ın Beynəlxalq İnkişaf Agentliyinin təşkilatçılığı ilə İnsan hüquqları sahəsində milli və beynəlxalq qanunvericilik mövzusunda universitetlərarası yarış keçirilib.
Əsas məqsədi insan hüquqları sahəsində milli və beynəlxalq qanunvericiliyin daha dərindən öyrənilməsi və təbliği olan yarışda Bakı Dövlət Universiteti, Polis Akademiyası, Qafqaz Universiteti, Qərb Universiteti və Prezident yanında Dövlət İdarəçilik Akademiyasının hüquq və beynəlxalq hüquq fakültələrinin tələbələrindən təşkil olunmuş 5 komanda iştirak edib.
Yarış insan hüquqlarına dair rol oyunları, məhkəmə çıxışları, kapitanların yarışı və sual-cavab formalarında keçirilib.
Yarış iştirakçılarının bilik və bacarıqlarını ölkənin nüfuzlu hüquqşünasları, vətəndaş cəmiyyəti qurumlarını təmsil edən 12 nəfərdən ibarət Münsiflər Heyəti qiymətləndirib.
Sonda Bakı Dövlət Universiteti və Prezident yanında Dövlət İdarəçilik Akademiyasının komandaları finala vəsiqə qazanıblar. Bu komandalar iyun ayında insan hüquqlarının müdafiəsi ilə bağlı beynəlxalq mexanizmlər sahəsində yarışacaqlar.
Qeyd edək ki, tədbirin informasiya dəstəyi isə Azərbaycan Hüquqşünaslar Forumu, Reportyorların Azadlıq və Təhlükəsizlik İnstitutu və Qoliaf Qrup təşkilatı tərəfindən həyata keçirilib.