Bu gün (22 noyabr) Reportyorların Azadlıq və Təhlükəsizlik İnstitutunun mətbuat mərkəzində Redaktorlar Birliyinin növbəti toplantısı keçirildi.
Daha sonra Redaktorlar Birliyi baş vermiş sui-qəsd cəhdinin araşdırılması üçün iki jurnalist, bir vəkil və bir nəfər istefada olan istintaqçının iştirakı ilə müstəqil təhqiqat qrupu yaradıb. Qrup baş vermiş qəsdin müstəqil təhqiqatını aparacaq.
Daha sonra toplantıda “Xural” qəzeti və bu qəzetin həbsdə olan baş redaktoru Əvəz Zeynallı ilə bağlı müzakirə keçirildi. Sonda Ə. Zeynallının da həbsi ilə bağlı yuxarıda qeyd etdiyimiz tərkibdə müstəqil təhqiqatın aparılmağı üçün qrup yaradıldı.
Redaktorların müzakirə etdiyi növbəti məsələ isə “Gündəm Xəbər” qəzetinə qarşı məhkəmə iddiaları ilə bağlı oldu. Qəzetin baş redaktoru Şirin Cəfərlinin verdiyi məlumata görə, qəzetə və ona qarşı vergidən yayınmaya görə başlanmış cinayət işi üzrə istintaq bitib və iş məhkəməyə verilib. İşə noyabrın 28-də saat 09. 20-də 1 saylı Bakı İqtisad Məhkəməsində baxılacaq. Qəzetə qarşı növbəti iddia isə Samux rayon icra hakimiyyəti başçısı Vilyam Hacıyevin “şərəf və ləyaqətin, işgüzar nüfuzun müdafiəsi və vurulmuş mənəvi zərərə görə 110 min manat təzminat” tələb etməsidir. Redaktorlar bu məsələni də diqqətdə saxlamaq barədə qərar verdilər.
Habelə redaktorlar “Xural” qəzetinin 3 il müddətinə həbs cəzasına məhkum edilən bölgə müxbiri Aydın Canıyevlə bağlı da müzakirə apardılar və onun həbsini pislədilər.