Bu gün (03 oktyabr) Bakı Apellyasiya Məhkəməsində Gündüz Quliyevin sədrliyi ilə Tatyana Çaladzenin “Bakı xəbər” qəzetinə qarşı şərəf, ləyaqət və işgüzar nüfüzun müdafiəsi tələbi üzrə məhkəməyə hazırlıq iclası keçirildi.
İlk çıxış edən cavabdeh tərəfin nümayəndəsi və “Bakı xəbər” qəzetinin redaktoru Vaqif Cəlaloğlu irəli sürülən iddianı qəbul etmədiyini məhkəməyə bildirdi: ”Ekspertiza hesab edir ki, məqalədə şərəf və ləyaqətin təhqir olunması qeydə alınmayıb. Məqalənin müəllifi olan Ruslan Xəlilov isə hazırda hərbi xidmətdədir. Biz məqaləni öz fikirlərimiz əsasında yox, müsahibə götürdüyümüz şəxsə istinadən yazmışıq və buna görə qəzet məsuliyyət daşımır”.
Sonda Hakim G.Quliyev prosesi 21 oktyabr saat 11:30 qədər təxirə saldı.
Xatırladaq ki, Tatyana Çaladze "Bakı xəbər" qəzetinin 13 aprel 2007-ci il tarixli sayında çap olunan "Tatyana Çaladzeyə iki ev veriblər" başlıqlı məqaləyə görə 29 yanvar 2008-ci il tarixində məhkəməyə verib. Çaladze iddia ərizəsində qəzetin təkzib verməsini və redaksiyanın 50.000 AZN məbləğində cərimələnməsi haqqında qərarın çıxarılması xahiş edib. Amma ilk məhkəmə instansiyası Çaladzenin iddiasını rədd edib.