Fəaliyyətini dayandırmış “Gündəlik Azərbaycan” qəzetinin əməkdaşı Yafəz Əkrəmoğlu (Həsənov) “Gündəm xəbər” qəzetinin 30 avqust 2010 – cu il tarixli sayı üçün yazdığı yazıya görə, sentyabrın 11-də Bakı şəhər Xəzər rayonu Polis İdarəsinin 1-ci Polis Bölməsinə dəvət olunub.
Onun sözlərinə görə, bu yazıdan sonra 1-ci Polis Bölməsinin Asəf adlı əməkdaşı ona zəng edib. “Məni telefonla polisə dəvət etsə də getməkdən imtina elədim. Tələb etdim ki, mənə rəsmi çağırış vərəqəsi göndərsinlər. O da məni hədələdi ki, əgər xoşluqla gəlməsən, səni zorla polisə gətirərik”.
Belə ki, sentyabrın 11-də Yafəz Əkrəmoğlu Media Hüququ İnstitutunun vəkili Fariz Namazlı ilə Polis Bölməsində olub. “Məndən yazını kimlərdən məlumat alaraq yazmağım barədə izahat aldılar. Mən bunu özümə qarşı təzyiq kimi dəyərləndirirəm”.
Vəkil Fariz Namazlının verdiyi məlumata görə, jurnalist yazının sonundakı qeydinə görə polisə dəvət edilib və bu məsələdə onu həbs təhlükəsi gözləmir. “Yafəz Əkrəmoğlu yazısının sonunda polis və prokurorluğun qeyd etdiyi şəxsin qanunsuz əməllərinə göz yumasını qeyd edib. Polis də bu məsələyə görə, onu dəvət edib”, – deyə Fariz Namazlı qeyd etdi.
Qeyd edək ki, 2005-ci ildən Eynulla Fətullayevin təsisçiliyi və baş redaktorluğu ilə “Realnıy Azerbaydjan” qəzeti həftəlik, “Gündəlik Azərbaycan” qəzeti isə gündəlik nəşr olunub. 2007-ci ildə baş redaktorun həbsindən sonra hər iki qəzet fəaliyyətini dayandırıb.