Bu gün (13 aprel) Yasamal rayon Məhkəməsində hakim Xəqani Məmmədovun sədrliyi ilə Bakı Dövlət İqtisadiyyat və Humanitar Kollecinin direktoru Bilman Vəliyevin “Gündəlik Bakı” qəzetinə qarşı mülki qaydada qaldırdığı iddiasına əsasən məhkəmə prosesi keçirilib.
Prosesdə cavabdeh “Gündəlik Bakı” qəzetinin baş redaktoru H. Vəliyev və onun vəkili Zaur İbadov, iddiaçı qismində Bakı Dövlət İqtisadiyyat və Humanitar Kollecinin direktoru Bilman Vəliyev və onun vəkili Pərvin Cabbarlı iştirak edirdilər.
Vəkil Z.İbadov iddiaya səbəb olan yazılarda təhqir elementlərinin olub-olmamasını müəyyən etmək üçün linqvistik ekspertizanın təyin edilməsi barədə vəsatət qaldırdı.
İddiaçının vəkli P.Cabbarlı vəsatətə etiraz etmədiyini bildirdi.
Hakim X. Məmmədov vəsatəti təmin edərək, prosesi qeyri-müəyyən vaxta təxirə saldı.
Xatırladaq ki, iddiaçı 2009-cu ili sonundan başlayaraq, 19 məqalədə şərəf və ləyaqətinin alçaldıldığını və təhqir edildiyini iddia edərək, cavabdehin ondan üzr istəməsi, habelə təkzib verməsini tələbi ilə məhkəməyə müraciət edib.