Bu gün (9 iyun) Qaradağ Rayon Məhkəməsində hakim İsmayıl Xəlilovun sədrliyi ilə “Gündəlik Azərbaycan” və “Realnıy Azerbaydjan” qəzetlərinin baş redaktoru Eynulla Fətullayevə qarşı qaldırılmış cinayət işi üzrə məhkəmə prosesi keçirilib.
Daha sonra ötən proseslərdə 12 saylı Cəzaçəkmə Müəssisəsinə baxış keçirilməsi, saç və dırnaq nümunələrinin ekspertizasının keçirilməsi, anonim şahidlərin dindirilməsi və E.Fətullayevin azadlığa buraxılması ilə bağlı qaldırılmış vəsatətlərə münasibət bildirmək üçün dövlət ittihamçısı Elçin Nağıyevə söz verilib. E. Nağıyev qaldırılan vəsatətləri əsassız hesab edərək, onların təmin edilməməsini xahiş edib.
Hakim yalnız 12 saylı Cəzaçəkmə müəssisəsinə baxış keçirilməsi ilə əlaqədar qaldırılmış vəsatətin təmin edilməsi ilə bağlı qərar qəbul edib.
Prosesdə həmçinin E. Fətullayevin ayaqqabılarından və gödəkcəsindən narkotik vasitələrin qalıqlarının aşkar edilməsi ilə bağlı rəy vermiş ekspert Ofeliya Zərbəliyeva dindirilib. E. Fətullayevin onun gödəkcəsindən və ayaqqabısından aşkar olunan heroinin tərkibində digər maddənin olması ilə bağlı sualına cavab olaraq, O.Zərbəliyeva bildirdi ki, orda hər hansı digər maddə aşkar edilməyib.
E. Fətullayev isə əvvəlki ekspertlərlə O. Zərbəliyevanın verdiyi ifadələr arasında ziddiyyətlər olduğunu bildirdi. O qeyd etdi ki, götürülən analizlərlə bağlı əvvəlki ekspert rəylərində və onların çıxışlarında da heroinlə yanaşı anfitamin və psixotrop maddələrin olduğu qeyd edilmişdi.
E.Fətullayev həmçinin növbəti məhkəmə iclasında “Monitor” jurnalının qətlə yetirilmiş baş redaktoru Elmar Hüseynovun işi ilə bağlı apardığı jurnalist araşdırmalarının nəticələri ilə bağlı çıxış etmək üçün 2 saat vaxt verilməsini xahiş etdi.
Növbəti proses 16 iyun saat 11:00-da 12 saylı Cəzaçəkmə Müəssisəsinə baxış keçirilməsi ilə davam etdiriləcək.
Qeyd edək ki, İnsan Hüquqları üzrə Avropa Məhkəməsi “Gündəlik Azərbaycan” və “Realnıy Azerbaydjan” qəzetlərinin həbsdə olan baş redaktoru Eynulla Fətullayevin işi üzrə qərar verib. Aprelin 22-də açıqlanan qərarda bildirilir ki, jurnalist dərhal azadlığa buraxılmalı və Azərbaycan dövləti ona 27 min 822 avro məbləğində təzminat ödəməlidir.
2007-ci il oktyabrın 30-da Ağır Cinayətlərə Dair İşlər üzrə Məhkəmənin qərarı ilə E.Fətullayev 8 il 6 ay müddətinə azadlıqdan məhrum edilib və ona 242 min 522 manat həcmində cərimə kəsilib.
29 dekabr 2009-cu ildə isə 12 saylı Cəzaçəkmə Müəssisəsində Fətullayevin üzərindən 0,223 qram heroin tapılıb. Bununla əlaqədar olaraq Qaradağ Rayon Polis İdarəsinin İstintaq Şöbəsində E. Fətullayev barəsində Cinayət Məcəlləsinin 234.1 (Satış məqsədi olmadan qanunsuz olaraq narkotik vasitələri və ya psixotrop maddələri şəxsi istehlak miqdarından artıq miqdarda əldə etmə və ya saxlama) maddəsi ilə açılmış cinayət işi üzrə istintaq yekunlaşıb və bu işə Qaradağ rayon məhkəməsində baxılır. Eynulla Fətullayev, vəkili, həmçinin bir çox yerli və beynəlxalq təşkilatlar bu işi yaxın zamanlarda jurnalistin həbsi ilə bağlı Avropa İnsan Haqları Məhkəməsinin qərarının qarşısını almaq məqsədilə əvvəlcədən qurulmuş əməliyyat kimi qiymətləndirir.