TƏHSİL ÜZRƏ EKSPERT YAZILARINA GÖRƏ MƏHKƏMƏYƏ VERİLDİ

fevral 22nd, 2010
Təhsil Nazirliyinin nəzdində fəaliyyət göstərən Dərslikləri Qiymətləndirmə Şurası (DQŞ) təhsil üzrə ekspert Əlövsət Osmanlının Cinayət Məcəlləsinin 147.1 maddəsi ilə məsuliyyətə cəlb edilməsi tələbi ilə Yasamal rayon məhkəməsinə müraciət edib.

Bu barədə Reportyorların Azadlıq və Təhlükəsizlik İnstitutuna (RATİ) Əlövsət Osmanlı özü məlumat verib. O, “Azadlıq” qəzetində təhsildəki nöqsanlarla bağlı yazdığı silsilə yazılardan birində getmiş “Dərslikləri Qiymətləndirmə Şurası dərslik komplektlərinin seçimində saxtakarlığa yol verir” cümləsini özlərinə qarşı böhtan hesab edən DQŞ üzvlərinin onunla bağlı Yasamal Rayon Məhkəməsinə müraciət etdiyini bildirib.
    Ə. Osmanlı məhkəmə iddiasının onu öz mövqeyindən çəkindirməyəcəyini və təhsildəki nöqsanlarla bağlı yazılarını davam etdirəcəyini bildirib.