“Azərbaycan mənə doğma, həm də vətənimə yaxın ölkədir. Digər tərəfdən də Azərbaycan Cenevrə Sazişinə qoşulub, qaçqınlarla da bağlı qanunu var. Bu səbəbdən müvəqqəti sığınacaq üçün Azərbaycanı seçmişəm”, – deyə qeyd edən Lazo Lazareişvili xahişinə müsbət baxılmayacağı təqdirdə üçüncü ölkəyə müraciət edəcəyini qeyd etdi.
Gürcüstanlı jurnalistin sözlərinə görə, onu evindən didərgin salan həyatına mövcud olan təhlükədir. Belə ki, 2009-cu ildə vəzifə səlahiyyətlərini aşmada ittiham olunaraq 9 ay müddətinə məhbus həyatını yaşamış və 5 min lari (2500 manat) cərimə olunmuş Lazo Lazareişvili qanunsuz saxlanılmağı, həm də haqqında çıxarılmış məhkəmə qərarı ilə bağlı Avropa İnsan Hüquqları Məhkəməsinə müraciət edib.
“Mənə Avropa Məhkəməsinə verdiyim şikayətləri geri götürməyim üçün təzyiqlər edilir. Mütəmadi olaraq özlərini polis əməkdaşı kimi təqdim edən 3-4 nəfər məni izləyirdi və onlar məni hədələyirdilər. Bu səbəbdən Gürcüstandan qaçmağa məcbur oldum”, – deyə qeyd edən Lazo Lazareişvili təhlükəsizliyinə təminat veriləcəyi təqdirdə Gürcüstana dönəcəyini də qeyd etdi. Amma o heç bir halda Avropa Məhkəməsinə verdiyi şikayətləri geri götürməyəcəyini də vurğuladı.