“Gündəlik Bakı” qəzetinin saytına qarşı haker müdaxiləsi olub.
Bu barədə Reportyorların Azadlıq və Təhlükəsizlik İnstitutuna (RATİ) “Gündəlik Bakı” qəzetinin baş redaktor müavini Vazeh Bəhramoğlu məlumat verib. Onun bildirdiyinə görə, dünən (3 avqust) bu barədə Milli Təhlükəsizlik Nazirliyinə, Daxili İşlər Nazirliyinə, Rabitə və İnformasiya Texnologiyaları Nazirliyinə, Respublika Baş Prokurorluğuna məktub şəklində müraciət edilərək, məsələnin aydınlaşdırılması xahişi olunub.
V. Bəhramoğlu qeyd etdi ki, özünü Hero_Aze ləqəbli haker kimi qələmə verən və “Azerbaijan Defacers” adlı haker qrupunun üzvü olduğunu bildirən şəxs Qaynar.info-nun elektron poçtuna məktub yazaraq, “Gündəlik Bakı” qəzetinin saytını dağıtmaq fikrində olmadığını, sadəcə proqramda olan boşluqların aradan qaldırılması üçün xəbərdarlıq etdiyini bildirib: " Sizin passwordunuzu (parolunuzu- red.) xarici qüvvələrin müdaxiləsindən qorumaq məqsədilə dəyişdim. İstəsəniz redaksiyaya gəlib məsələni hərtərəfli araşdıra bilərəm”.
V.Bəhramoğlu əlavə etdi ki, hazırda hakerlə danışıqlar apararaq, problemin həll olunmasına çalışırlar.