Prosesdə şahid qismində 15 saylı cəzaçəkmə müəssisəsinin tibb-sanitar hissəsinin rəisi Kamal Rüstəmov ifadə verdi. Qeyd edək ki, dünənki məhkəmə prosesində iddiaçının vəkili R. Məmmədov N.Məmmədovun tibbi kartında yer alan imzaların 15 saylı cəzaçəkmə müəssisəsinin tibb-sanitar hissəsinin rəisi Kamal Rüstəmova məxsus olmadığını, imzalar arasında fərqlərin olduğunu deyərək, bununla bağlı xətşünaslıq ekspertizasının keçirilməsi və K.Rüstəmovun məhkəməyə çağırılması barədə vəsatət qaldırmışdı.
K.Rüstəmov ifadəsində mərhum N.Məmmədovun tibbi kartında yer alan imzaların özünə məxsus olduğunu bildirdi.
Vəkil R. Məmmədov isə onun doğru söyləmədiyini bildirdi.
Hakim İ. Şirinov qərarı elan etmək üçün məhkəmə prosesini 25 noyabr saat 10:00-a təyin etdi.
Qeyd edək ki, Məryəm Məmmədova və Emil Məmmədov Nizami rayon məhkəməsinin 06 fevral 2009-cu il tarixli, 6(007)-7/09 saylı qərarı ilə cavabdehlərin üzərinə qoyulmuş, mərhum Novruzəli Xanməmməd oğlu Məmmədovun müayinə və müalicə olunması vəzifələrinin icra olunmamasını (hərəkətsizliyi) yaşamaq hüququnun pozuntusu kimi qanunsuz hesab edilməsini, həmçinin cavabdehlərin hərəkətsizliyi nəticəsində onlara dəymiş mənəvi ziyana görə 3.000.000 manat məbləğində təzminat ödənilməsini istəyirlər.
Xatırladaq ki, “Tolışi Sədo” (“Talışın Səsi”) qəzetinin baş redaktoru Novruzəli Məmmədov 17 avqust 2009-cu il tarixdə Ədliyyə Nazirliyi Penitensiar Xidmətinin Mərkəzi Xəstəxanasında vəfat edib. N.Məmmədov 2007-ci ildə qapalı keçirilən məhkəmədə Azərbaycan Respublikası Cinayət Məcəlləsinin 274-cü (“Dövlətə Xəyanət”) maddəsi ilə 10 il müddətinə azadlıqdan məhrum edilsə də, milliyyətcə talış olan N.Məmmədov özünü təqsirli bilməyərək, etnik-siyasi motivlərlə və ifadə azadlığına görə həbs olunduğunu iddia edirdi.