SABİQ ƏMƏKDAŞININ AZTV-YƏ QARŞI İDDİASI ÜZRƏ MƏHKƏMƏ PROSESİ KEÇİRİLƏCƏK

sentyabr 29th, 2010
Bu gün (29 sentyabr) Səbail rayon Məhkəməsində hakim Fuad Hüseynovun sədrliyi ilə  Azərbaycan Televiziya və Radio Verilişləri Qapalı Səhmdar Cəmiyyətinin (AzTV) sabiq redaktoru Asəf Quliyevin televiziyaya qarşı iddiasına əsasən məhkəmə prosesi keçirilib.

Prosesdə cavabdeh tərəfdən AzTV-nin nümayəndəsi Sədrəddin İsgəndərov iştirak etsə də iddiaçı və onun nümayəndəsi prosesdə iştirak etməyiblər.
Hakim F.Hüseynov iddiaçının nümayəndəsi Fariz Namazlı tərəfindən məhkəməyə  onun səfərdə olması səbəbindən prosesin təxirə salınması barədə vəsatətin daxil olduğunu deyərək, prosesi 5 oktyabr 16:00-a təyin etdi.
Xatırladaq ki, Azərbaycan Televiziya və Radio Verilişləri Qapalı Səhmdar Cəmiyyəti bu il iyulun 31-də müqavilə müddəti başa çatandan sonra Asəf Quliyevlə yeni müqavilə bağlamayıb. A. Quliyev  şirkət  rəhbərliyinin işdən çıxarılmağı ilə  bağlı əmrinin ləğvini, müddətsiz müqavilə bağlanılması şərti ilə AzTV-də redaktor vəzifəsinə təyin edilməsini, işi buraxdığı  müddətin əməkhaqqının  və kompensasiya ödənməsini tələb edir.