REPORTYORLARIN AZADLIQ VƏ TƏHLÜKƏSİZLİK İNSTİTUTUNUN BƏYANATI!

Reportyorların Azadlıq və Təhlükəsizlik İnstitutu (RATİ) oktyabrın 19-da “Xural” qəzetinə məxsus olan kompyüterlərin və digər texniki avadanlıqların məhkəmə icraçıları tərəfindən qanunun tələbinə məhəl qoyulmadan müsadirə edilməsini  pisləyir və bunu hakimiyyətin söz azadlığına basqısı kimi qiymətləndirir.

Belə ki, Azərbaycan Respublikası Prezident Administrasiyasının rəhbəri Ramiz Mehdiyevin qəzetə qarşı iddiasına əsasən çıxarılmış 10.000 manat və KİV-ə Dövlət Dəstəyi Fondunun icraçı direktoru Vüqar Səfərlinin iddiası üzrə çıxarılmış  5.000 manat, və müğənni Nüşabə Ələsgərlinin iddiası üzrə çıxarılmış 4.000 manat cəriməyə görə 2011-ci ilin may ayında “Xural” qəzetinin əmlakı siyahıya alınmışdı. Amma qəzetin cərimələri ödəməyə maddi imkan olmadığından icranın dayandırılması ilə bağlı məhkəməyə müraciət edib.  

Qeyd edək ki, “Xural” qəzeti 2002-ci il oktyabr ayından həftəlik, 2011-ci il sentyabrın 20-dən gündəlik dərc olunur.  ”Xural” qəzetinin baş redaktoru  Əvəz Zeynallının verdiyi məlumata görə, dostların  istifadə üçün verdikləri avadanlıqlarla qəzet gündəlik olaraq dərc olunmağa başlamışdı. Praktik olaraq müsadirə olunan mülkün çox az hissəsi “Xural” qəzetinə məxsus olub. Habelə məhkəmə icraçıları “Xural” qəzetinin redaksiyası ilə eyni binada yerləşən “liberal.az” saytının bir otaqlı ofisindəki əmlakın da “Xural” qəzetinə aid olduğunu ehtimal etdiklərini deyərək müsadirə ediblər.

RATİ qeyd edir ki, məhkəmə icraçıları mülkün müsadirə olunmağı üçün cavabdehə qərardan şikayət verməyə də imkan verilməyib. Qərardan 10 gün müddətinə şikayət vermək hüququ tanınsa da Nərimanov rayonunun məhkəmə icraçıları qanunsuz olaraq, məhkəmə qərarını dərhal və iş saatı bitdikdən sonra  icra ediblər.

RATİ hesab edir ki, baş verənlər müstəqil bir qəzetin susdurulması üçün həyata keçirilmiş aktdır və bunun məsuliyyəti birbaşa Azərbaycan hökumətinin rəhbərliyi daşıyır.

Cəmi bir ay müddətində gündəlik dərc olunmağına baxmayaraq “Xural” qəzeti Azərbaycan cəmiyyətində ciddi populyarlıq qazanıb və qəzet sərt tənqidi mövqeyi ilə seçilir. RATİ qəzetin susdurulması üçün bu qəti addımın da məhz son aydakı daha geniş fəaliyyəti və xüsusilə prezident İlham Əliyevin 2011-ci il oktyabrın 11-də “Əl-Cəzirə”yə verdiyi müsahibəsindəki fikirlərin tənqid olunmağı ilə əlaqəli olmağını istisna etmir. Bu səbəbdən də RATİ Azərbaycan hakimiyyətini və dövlətin  rəhbərliyini azad mətbuata dözümlü olmağa, “Xural”  qəzetinə qarşı qurama ittihamlardan vaz keçməyə və qəzet redaksiyasından aparılmış mülkün qısa müddətdə geri qaytarılmağını tələb edir.

 

Previous Post

AKSİYAÇILAR POLİS MÜDAXİLƏSİNƏ MƏRUZ QALDILAR

Next Post

XURAL QƏZETİNİN BAŞ REDAKTORU ƏVƏZ ZEYNALLI İLƏ MÜSAHİBƏ

Leave a Reply

Your email address will not be published. Required fields are marked *

Start typing to see posts you are looking for.