REPORTYORLARIN AZADLIQ VƏ TƏHLÜKƏSİZLİK İNSTİTUTUNUN BƏYANATI

noyabr 8th, 2010
Reportyorların Azadlıq və Təhlükəsizlik İnstitutu (RATİ) 07 noyabr 2010-cu il tarixində Azərbaycan Milli Məclisinə keçirilən seçkilər zamanı seçki komissiyaları üzvlərinin, polisin və digər icra strukturları nümayəndələrinin  jurnalistlərin peşə fəaliyyətinə mane olmalarını qətiyyətlə pisləyir. 

Ayrı-ayı seçki komissiyalarında səsvermənin nəticələrini müşahidə edən “Azadlıq”, “Yeni Müsavat” və “Ayna-Zerkalo” qəzetləri, “Azadlıq” radiosu, RATİ, “Turan” İnformasiya Agentliyinin və digər Kütləvi İnformasiya Vasitələrinin əməkdaşları ciddi təzyiqlərlə üzləşiblər. Jurnalistlərə  bir çox halda çəkiliş aparmağa imkan verilməyib. Bəzi məntəqələrindən müşahidə aparan jurnalistlər  polis vasitəsi ilə  zorla seçki məntəqəsindən uzaqlaşdırılıblar . Bir necə halda jurnalist müşahidəçiləri polis vasitəsi ilə məhkəməyə aparılaraq orada 3 saatdan artıq qanunsuz olaraq saxlanılmasına, o cümlədən 31-ci Suraxanı seçki  dairəsində RATİ-nin müşahidəçisi Nizami Cəfərov heç bir əsas olmadan 5 saatadək məhkəmədə saxlanıldıqdan sonra onun  müşahidəçi statusunun ləğv olunması ilə bağlı qərar verilmişdir.

 RATİ bu faktları qeyd edərək xatırladır ki, 2005-ci il parlament seçkilərindən fərqli olaraq bu il keçirilən parlament seçkiləri zamanı səsvermə prosesi barədə vizual (video və foto ) qeydlərin aparılmasına ciddi-cəhdlə maneçiliklər törədilib. Habelə Mərkəzi Seçki Komissiyasının 500 seçki məntəqəsində veb kameralar vasitəsi ilə seçkilərin izlənilməsi barədə verdiyi açıqlama da həqiqətə uyğun olmayıb. RATİ-nin araşdırması zamanı bu xidmətdən istifadə edərək seçkilərin müşahidəsini həyata keçirmək mümkün olmayıb.

Yuxarıda sadalanan faktları qeyd edən RATİ baş verənlərlə bağlı “Kütləvi İnformasiya Vasitələri haqqında”, “Məlumat əldə edilməsi haqqında” Azərbaycan Respublikası qanunlarının  kobud şəkildə pozulduğunu  bildirir.

RATİ  hesab edir ki, bir qayda olaraq seçki prosesini izləmək istəyən  jurnalistlərə süni maneçiliklərin  törədilməsi  seçkiləri  şəffaf və ədalətli olmadığı göstərir.

RATİ Azərbaycan hökumətini baş vermiş qanun pozuntularının aradan qaldırmağa, KİV nümayəndələri  və digər müşahidəçilərə qarşı qanunsuzluq etmiş şəxsləri isə cəzalandırmağa çağırır.