Reportyorların Azadlıq və Təhlükəsizlik İnstitutu (RATİ) Azərbaycanda 2005-ci ildə qəbul edilmiş “İnformasiya əldə etmək haqqında” qanunda nəzərdə tutulan media ombudsmanı institutunun yaradılmasından və media ombudsmanın təyin edilməsindən imtina olunmağına dair Milli Məclisin dekabrın 21-də “İnsan hüquqları üzrə müvəkkil (ombudsman) haqqında” Konstitusiya Qanununa təklif olunan əlavə və dəyişiklikləri qəbul etməsini qətiyyətlə pisləyir.
Belə ki, Azərbaycan Respublikası Prezidenti tərəfindən Milli Məclisə təqdim edilən Konstitusiya qanununa əlavə və dəyişiklik layihəsində media ombudsmanın səlahiyyətlərinin insan hüquqları üzrə müvəkkilə, yəni hazırkı ombudsmana verilmiş olur. Prezidentin göndərdiyi layihədə “İnsan hüquqları üzrə müvəkkil (ombudsman) haqqında” konstitusiya qanununa yeni – 13-1 maddə əlavə edilib. “İnformasiya əldə etmək hüququnun pozulmasına dair şikayətə baxılmasının xüsusiyyətləri” kimi tövsiyə edilən 16 bənddən ibarət yeni maddə ilə avtomatik olaraq hazırkı insan haqları üzrə ombudsmana media omdudsmanının səlahiyyətləri verilmiş olur.
RATİ qeyd edir ki, hazırkı ombudasmanın hakimiyyətin dolayı nəzarəti altında fəaliyyət göstərməsi kimi qiymətləndirmələr var və buna görə də indiki ombudsmana əlavə səlahiyyətlərin verilməsi yox, onun əslində insan haqlarını daha da yaxşı və səmərəli şəkildə qoruması sahəsində işinin təkmilləşdirilməsinə ehtiyac var.
RATİ media ombudsmanı institutunun yaradılmasından faktiki imtina olunmasını Azərbaycan hökumətinin informasiya azadlığını təmin etməkdə maraqlı olmadığını bir daha sübut edir.
RATİ Azərbaycan hökumətini bu qərardan imtina etməyə və müstəqil media ombudsmanı institutunu yaratmağa çağırır.