Dünən (28 iyul) Naxçıvan şəhər Məhkəməsində hakim Hicran Muradovun sədrliyi ilə Reportyorların Azadlıq və Təhlükəsizlik İnstitutunun (RATI) Naxçıvandakı bölgə müxbiri Həkimeldostu Mehdiyevin Naxçıvan şəhər Polis Şöbəsinin rəisi Səbuhi Novruzovun fəaliyyətsizliyi haqda Naxçıvan şəhər məhkəməsində qaldırdığı iddia üzrə qərar çıxarılıb.
Xatırladaq ki, 29 yanvar 2009-cu il tarixdə saat 18:55-də RATİ-nin Naxçıvandakı bölgə müxbiri Elman Abbasovun istifadə etdiyi mobil telefon nömrələrinə hədə xarakterli zənglər olunub. Özünü Sədərək rayon sakini Malik Əliyev kimi təqdim edən şəxs Elman Abbasovun və həmkarı Həkimeldostu Mehdiyevi təhqir edib və ölümlə hədələyib. Habelə həmin şəxs müxbirlərin redaksiya kimi istifadə etdikləri Demokratiya və QHT-lərin İnkişaf Resurs Mərkəzinin Naxçıvan şəhər, Atatürk prospekti 33 ünvanında yerləşən ofislərini partladaraq onları öldürəcəyini bildirib. Təxminən 10 dəqiqə sonra həmin şəxs “Azadlıq” radiosunun və “Turan” İnformasiya agentliyinin müxbiri Məlahət Nəsibovanın da mobil telefonuna zəng edərək müxbiri ölümlə hədələyib. O, 4 fevral 2009-cu il tarixdə saat 22:45-də isə H.Mehdiyevin mobil telefonuna zəng edərək növbəti dəfə jurnalistləri hədələyib və onların ünvanlarına nalayiq söyüşlərlə təhqir edib.