Bu gün (04 fevral) Yasamal rayon Məhkəməsində hakim Mətanət Hacıyevanın sədrliyi ilə Yasamal rayon Polis İdarəsinin istintaq şöbəsində Cinayət Məcəlləsinin 221.2 (xuliqanlıq) maddəsi ilə aparılmış cinayət işinə əsasən, " Korrupsiya və Cəmiyyət" jurnalının baş redaktorunun müavini Mübariz Məsimoğluna və onun tanışı Şakir Abbasova qarşı məhkəmə hazırlıq iclası keçirildi.
Hakim prosesi M. Məsimoğlu 30 yanvar tarixində qaldırdığı vəsatətin təmin olunmadığını elan etməklə, cinayət işinin icraata götürüldüyünü elan etdi.
Qeyd edək ki, M. Məsimoğlu cinayət işinin araşdırılması üçün prokuror nəzarəti altında ilkin istintaqa qaytarılmasını barədə vəsatət qaldırmışdı. M. Məsimoğlu cinayət işinin qeyri-obyektiv aparıldığını bildirmişdi. O, qeyd etmişdi ki, 2000-ci ildə "Babadağ" qəzetində "Şəmkir polisinin çörəyi daşdan çıxır" başlığı altında yazdığı altı tənqidi məqalənin qisasını almaq üçün, əvvəllər Şəmkir RPŞ-nin İstintaq bölməsi rəisi olmuş Yasamal rayon Polis İdarəsinin hazırkı rəis Möhübbət Hüseynov bu cinayət işinin qərəzli aparılmasına göstəriş verib.
Xatırladaq ki, 2008-ci ilin avqust ayında marşrut avtobusda "Korrupsiya və Cəmiyyət" jurnalının baş redaktorunun müavini Mübariz Məsimoğlu ilə Məleykə Əsədova və Emil Carçıyev arasında mübahisə yaranıb və insidentlə bağlı Yasamal rayon Polis İdarəsinin istintaq şöbəsində Mübariz Məsimoğluna qarşı "xuliqanlıq" maddəsi ilə cinayət işi qaldırılıb.
Məhkəmə prosesi fevralın 13-də saat 15:00-a davam edəcək.