Dünən (07 dekabr) vəkil Elçin Sadıqov Bakı İstintaq Təcridxanasında saxlanan “Gündəlik Azərbaycan” və “Realnıy Azerbaijan” qəzetlərinin həbsdə olan baş redaktoru Eynulla Fətullayevlə görüşüb. Bu barədə bu gün (08 dekabr) Reportyorların Azadlıq və Təhlükəsizlik İnstitutuna (RATİ) Elçin Sadıqovun özü məlumat verib.
E. Sadıqov baş redaktorla Ali Məhkəmə Plenumunun qərarını, qarşıdakı prosesləri müzakirə etdiyini və jurnalistin həbsi ilə bağlı növbəti məhkəmə iddiasının hazırlandığını dedi:
“Bu iddia Eynulla Fətullayevin 12 saylı Cəzaçəkmə Müəssisəsində cəza çəkdiyi dövrdə və 2009-cu ilin dekabrın 29-da qondarma narkotik ittihamı ilə həbs olunduğu zaman üzləşdiyi qeyri-insani rəftar və işgəncə halları ilə bağlıdır. Narkotik ittihamı araşdırılarkən Qaradağ Rayon Məhkəməsində və Bakı Apellyasiya Məhkəməsində keçirilən proseslərdə dəfələrlə işgəncə faktlarının araşdırılması barədə məsələ qaldırmışıq. Lakin bunların heç biri araşdırılmayıb. Ona görə də işgəncə və qeyri-insani rəftarla bağlı ayrıca iddia hazırlamışıq. İddianı bu həftə Qaradağ Rayon Məhkəməsinə təqdim edəcəyik”, – deyə vəkil qeyd etdi.
Xatırladaq ki, 06 iyul 2010-cu ildə Eynulla Fətullayev Cinayət Məcəlləsinin 234.1-ci maddəsi ilə (Satış məqsədi olmadan qanunsuz olaraq narkotik vasitələri və ya psixotrop maddələri şəxsi istehlak miqdarından artıq miqdarda əldə etmə və ya saxlama) təqsirli bilinərək, 2 il 6 ay müddətinə azadlıqdan məhrum edilib və hökmün icrası elan edildiyi gündən hesablanır. Bu hökm 29 dekabr 2009-cu ildə 12 saylı Cəzaçəkmə Müəssisəsində Fətullayevin üzərindən 0,223 qram heroin tapılması ilə bağlı irəli sürülmüş ittiham üzrə çıxarılıb. Məhkəmə qərarından verilən şikayətə Apellyasiya Məhkəməsində baxılır.
Onu da qeyd edək ki, E.Fətullayev 2007-ci il aprelin 20-də Qaçqın və Məcburi Köçkünlərin Hüquqlarını Müdafiə Birliyinin sədri Tatyana Çaladzenin iddiasına əsasən Yasamal Rayon Məhkəməsinin qərarı ilə məhkəmə zalında həbs edilib. Həbs edildikdən bir ay sonra “Realnıy Azerbaydjan” qəzetində dərc olunan və Azərbaycanda işləyən xarici ölkə vətəndaşları və beynəlxalq qurumlarda təşviş yaratdığı iddia olunan yazı ilə əlaqədar Milli Təhlükəsizlik Nazirliyinin Baş İstintaq İdarəsində E.Fətullayevlə bağlı cinayət işi başlanıb. Cinayət Məcəlləsinin 214.1-ci (terrorçuluqla hədələmə) və 283.2.2-ci (qulluq mövqeyindən istifadə etməklə milli, irqi, sosial və ya dini nifrət və düşmənçiliyin salınması) maddələri ilə ittiham irəli sürülüb və məhkəmə yoluyla onun barəsində həbs-qətimkan tədbiri seçilib. Sonradan istintaq E.Fətullayevi külli miqdarda vergidən yayınmada (213.2.2-ci maddə) da ittiham edib. 2007-ci il oktyabrın 30-da Ağır Cinayətlərə Dair İşlər üzrə Məhkəmənin qərarı ilə E.Fətullayev 8 il 6 ay müddətinə azadlıqdan məhrum edilib və ona 242 min 522 manat həcmində cərimə kəsilib.
Avropa İnsan Hüquqları Məhkəməsi isə bu il aprelin 22-də yuxarıda qeyd edilən cinayət işləri ilə bağlı qərar qəbul etmişdi. Qərarda bildirilir ki, jurnalist dərhal azadlığa buraxılmalı və Azərbaycan dövləti ona 27 min 822 avro məbləğində təzminat ödəməlidir. Ali Məhkəmənin Plenumu isə noyabrın 11-də bu qərarı qismən təmin etmək barədə qərar açıqlasa da, sonradan bu qərarın ümumiyyətlə dəyişdirilməsi bəlli olub.