Bütün siyasi qüvvələrin KİV-ə, ilk növbədə televiziyaya bərabərhüquqlu çıxışı təmin olunmalıdır. Bu Avropa Şurası (AŞ), ATƏT və Avropa Birliyinin (AB) Azərbaycanda keçiriləcək prezident seçkisinin demokratik keçirilməsinin təmin edilməsi üzrə birgə hazırladıqları fəaliyyət planının əsas istiqamətlərindən biridir(APA).
Dünən (30 aprel) hazırlanan planın təqdimatı keçirilib. Mərasimdə çıxış edən AŞ baş katibinin Bakıdakı xüsusi nümayəndəsi Denis Bribosia seçki prosesinin mediada müstəqil və tərəfsiz şəkildə işıqlandırılmasına diqqət yetirəcəklərini xüsusi vurğulayıb. Telekanallarda teledebatların keçirilməsinin və MSK-nın fəaliyyətini işıqlandıran KİV-in dəstəklənməsinin son dərəcə vacib olduğunu deyən Bribosianın sözlərinə görə, AŞ bir neçə həftə ərzində KİV üzərində monitorinq keçirməyi də planlaşdırır.