Prosesdə şahid qismində ifadə vermək üçün deputat Gülər Əhmədovanın dəvət edildiyini görən Əvəz Zeynallı şahidlərin dindirilmə ardıcıllığı ilə bağlı razılaşmanın pozulduğunu və buna hazırlaşmadığını bildirdi. Hakimin prosesi davam etdirməkdə israrlı olduğunu görən Zeynallı vəkili Elçin Sadıqovun prosesdə iştirakdan imtina etməsini istədi. Sadıqov isə müdafiə etdiyi şəxsin istəyinə uyğun hərəkət etməli olduğunu bildirərək prosesi tərk etdi. Bu zaman Gülər Əhmədova və Əvəz Zeynallı arasında insident yarandığına görə məhkəmədə fasilə elan edildi.
Fasilədən sonra Gülər Əhmədovanın ifadəsi dinlənilsə də, vəkili Mənsum Bayramov Əvəz Zeynallının səhhətində problem olduğunu əsas gətirərək Gülər Əhmədovaya suallar verə bilməyəcəklərini dedi və məhkəmənin təxirə salınması ilə bağlı vəsatət qaldırdı. Hakim vəsatəti təmin edərək növbəti prosesin iyulun 11-də saat 11:00-a təyin edilməsi ilə bağlı qərar qəbul etdi.
Xatırladaq ki, YAP siyasi Şurasının üzvü, deputat Gülər Əhmədovanın şikayəti əsasında Korrupsiyaya Qarşı Mübarizə İdarəsində baş redaktor barəsində Cinayət Məcəlləsinin 311.3.3 (külli miqdarda rüşvət alma) və 311.3.4-cü (hədə-qorxu tətbiq olunmaqla rüşvət alma) maddələri ilə cinayət işi başlanıb və 2011-ci il oktyabrın 28-də Nəsimi rayon Məhkəməsi Əvəz Zeynallı barəsində 3 aylıq həbs qətimkan tədbiri seçib. 2012-ci il yanvar ayının 17-də baş redaktorun həbs 3 ay, aprelin 12-də isə 1 ay müddətinə uzadılıb.