“İnsan Hüquqları və Mətbuatın Monitorinqi” İctimai Birliyinin Naxçıvan Muxtar Respublikasının Ədliyyə Nazirliyinə hüquqi şəxs kimi qeydiyyata alınması ilə bağlı müraciətinə 6 aydan sonra “yox” cavab verib.
“Qeydiyyatdan imtinaya səbəb kimi, İctimai Birliyin nizamnaməsinin təsisçilər tərəfindən imzalanmadığı göstərilib və Hüquqi Şəxslərin Qeydiyyatı və Dövlət Reyestri Haqqında Qanunun 8-ci maddəsinə istinad edilib:
“Biz təşkilatın müvafiq sənədləri imzalayıb göndərmişik. Göndərməmişdən əvvəl isə təşkilatın sənədlərini hüquqşünaslar yoxlayıb. Əgər bu cür problem var idisə, müraciət olunandan bir ay müddətində təsisçilərə bildirilməli idi. Lakin Ədliyyə Nazirliyi qanunvericiliyin tələbini pozaraq təsisçilərə 6 aydan sonra cavab verib. Bu səbəbdən biz məhkəməyə müraciət edəcəyik” – deyə Elman Abbasov deyib.
Xatırladaq ki, “İnsan Hüquqları və Mətbuatın Monitorinqi” İctimai Birliyi 2010-cu ilin may ayının 5-də təsis edilib və 20 may 2010-cu il tarixdə dövlət qeydiyyatına alınması üçün sənədlər Ədliyyə Nazirliyinə göndərilib. Təşkilatın qeydiyyata alınması üçün Naxçıvan Muxtar Respublikası Ədliyyə Nazirliyinə edilən müraciəti uzun müddət cavablandırmayıb. Bu səbəbdən də təsisçilər 17 sentyabr 2010-cu il tarixdə Naxçıvan Muxtar Respublikası Ədliyyə Nazirliyinə qarşı Naxçıvan Şəhər Məhkəməsinə iddia qaldırmışdılar. Amma bu iddia məhkəmə tərəfindən icraata götürülməmişdi.