Ombudsman Elmira Süleymanova Reportyorların Azadlıq və Təhlükəsizlik İnstitutunun (RATİ) müraciətini cavablandırıb. Qeyd edək ki, RATİ müraciətində Bakı Apellyasiya Məhkəməsinin hakimi Cəmilə Səfiyevanın tələbə-jurnalist Elmin Bədəlovun
şikayəti üzrə açıq keçirilən məhkəmə prosesinə müşahidəçiləri və jurnalistləri buraxmamasını araşdırılmasını xahiş etmişdi. Ombudsman Elmira Süleymanovanın imzası ilə bu gün (04 avqust) daxil olan cavab məktubunda bildirilir ki, RATİ-nin müraciətilə bağlı Bakı Apellyasiya Məhkəməsinə sorğu göndərilmiş və cavab alınmışdır.
Apellyasiya məhkəməsinin verdiyi cavabda bildirilib ki, sözügedən prosesdə məhkəmə iclası başlanandan sonra media nümayəndələrinin icazəsiz şəkildə iclas zalına daxil olmalarına sədrlik edən hakim tərəfindən Azərbaycan Respublikası Mülki Prosessual Məcəlləsinin 176.4-cü maddəsinə əsasən razılıq verilməmişdir. Apellyasiya məhkəməsi Ombudsmana məktubunda onu da bildirib ki, bu barədə 01. 07. 2010-cu il tarixdə Bakı Apellyasiya Məhkəməsi tərəfindən RATİ-yə məktub göndərilmiş və qeyd edilən iş üzrə məhkəmə iclasının nə vaxta təxirə salınması barədə məlumat verilməklə izah edilmişdir ki, Bakı Apellyasiya Məhkəməsində qapalı keçirilən məhkəmə iclasları istisna olmaqla, hər bir şəxs, o cümlədən media nümayəndələri də, açıq məhkəmə iclasında iştirak edə bilərlər. Həmçinin qeyd edilən iş üzrə 02.07.2010-cu il tarixdə keçirilən açıq məhkəmə iclasında media nümayəndələrinin də iştirak etdiyi vurğulanıb.