Prosesdə çıxış edən Vəkillər Kollegiyasının Rəyasət Heyətinin nümayəndəsi Altay Muradov bildirdi ki, Osman Kazımov vəkillik etikasına zidd hərəkət edib, qanunun tələblərin pozaraq müdafiə etdiyi şəxsi müdafiəsiz qoyub.
“O, üzləşdirmə protokoluna imza atmayıb. Eyni zamanda digər istintaq hərəkətlərində də iştirak etməkdən üzrsüz səbəbdən boyun qaçırıb. Vəkilin bu hərəkəti ilə bağlı Azərbaycan Respublikası Baş Prokurorun birinci müavini Rüstəm Usubov Vəkillər Kollegiyasına müraciət edib. Bu müraciət Vəkillər Kollegiyası İntizam Komissiyası tərəfindən araşdırılmış və 4 fevral 2011-ci il tarixində Vəkillər Kollegiyası Rəyasət Heyəti Osman Kazımovun vəkillik fəaliyyətinin dayandırılması və qurum üzvlüyündən çıxarılması üçün məhkəməyə müraciət olunması barədə qərar qəbul edib. Mən də məhkəmədən Osman Kazımovun Vəkillər Kollegiyasından xaric edilməsi barədə qətnamə çıxarmağı xahiş edirəm”, – deyə Altay Muradov məhkəmədə bildirib.
İddiaçının nümayəndəsinə suallar verən Osman Kazımov bildirib ki, o üzləşdirmə protokolunda müstəntiq tərəfindən şahid ifadəsi təhrif edildiyinə görə etiraz edib və protokolu da imzalamayıb:
“Bununla bağlı Baş Prokuror Zakir Qaralova vəsatət göndərmişəm. O isə vəsatətimin rədd edilməsi ilə bağlı qərar verib. Eyni zamanda mən istintaq hərəkətlərində iştirak etmək üçün göndərilən çağırış vərəqələrini nə vaxt almağım barədə Vəkillər Kollegiyası rəyasət Heyətinə verdiyim izahatda qeyd etmişəm”, – deyə Kazımov bildirdi.
Kazımov işlədiyi hüquq məsləhətxanasının müdiri Sümbülə Əliyevanın, müdafiə etdiyi şəxs Tural Kərimov və bu iş üzrə müstəntiq Kamal Talıboun məhkəmədə dindirilməsi barədə vəsatətlə çıxış etdi.
Proses zamanı aqressiv davranışlar nümayiş etdirən iddiaçının nümayəndəsi Feruz Quliyev ilə proses iştirakçıları arasında konflikt yarandığından hakim vəsatətə münasibət bildirmədi.
Hakim Hüseyn Səfərov iddiaçı tərəfdən Vəkillərin Etik davranış Qaydaları haqqında Əsasnaməni və Osman Kazımova göndərilmiş çağırış vərəqələrini məhkəmə təqdim etməyi tələb etdi.
Hakim növbəti prosesi 24 iyun saat 15:20-yə təyin etdi.
Xatırladaq ki, Vəkillər Kollegiyası Rəyasət Heyətinin fevralın 4-də keçirilən iclasında Osman Kazımovun vəkillik fəaliyyətinin dayandırılması və qurum üzvlüyündən çıxarılması üçün məhkəməyə müraciət olunması barədə qərar qəbul edilib. Rəyasət Heyəti bu qərarı baş prokurorun birinci müavini Rüstəm Usubovun təqdimatı əsasında çıxarıb. Prokurorluq Osman Kazımovu Cinayət Prosessual Məcəlləsini və “Vəkillik fəaliyyəti haqqında” qanunu pozmaqda ittiham edir.