10 saylı cəzaçəkmə müəssisəsində cəza çəkən “Azadlıq” qəzetinin əməkdaşı, satirik yazar Sakit Zahidov (Mirzə Sakit) dünən (10 dekabr) ailəsi ilə telefon vasitəsilə əlaqə saxlayıb.
Bu barədə RATİ-yə jurnalistin həyat yoldaşı Rəna Zahidova məlumat verdi.
”Sakit Zahidov ilk öncə uşaqların vəziyyəti ilə maraqlandı. Özünün isə ümumi vəziyyətinin pis olmadığını dedi”, – deyə qeyd edən Zahidova həyat yoldaşının yenidən cəzaçəkmə müəssisəsinə qayıtmasının onlara çox pis təsir etdiyini də bildirdi: “Ailəmiz üçün dekabr ayının 8-i kədərli keçdi. Sakit yenidən cəzaçəkmə müəssisəsinə qaytarıldı. Amma bir həftə olsa belə azadlığa buraxılmaq da az müddət deyildi. Amma təəssüf ki, bu günlər bizim üçün tez çox tez bitdi”.
17 saylı cəzaçəkmə müəssisəsində cəza çəkən “Azadlıq” qəzetinin baş redaktoru Qənimət Zahidov (Zahid) isə cəzaçəkmə müəssisəsinə qayıdandan sonra ailəsi ilə əlaqə saxlamayıb. Bu barədə RATİ-yə məlumat verən jurnalistin həyat yoldaşı Ayəndə Mürsəliyeva bildirdi ki, Q. Zahidovla adətən həftə sonları görüşmək imkanı olur: “Cəzaçəkmə müəssisəsinə qayıtdıqdan sonra ilk dəfə dekabr ayının 15-də Qənimətlə görüşmək imkanımız olacaq”.
Qeyd edək ki, Zahidov qardaşlarının atası Səlim Zahidov dekabrın 1-i axşam saatlarında vəfat edib. Zahidov qardaşlarının anaları Xədicə Zahidovanın Ədliyyə Nazirliyinə vurduğu teleqramdan sonra dekabrın 2-dən 3-ə keçən gecə müvəqqəti olaraq azadlığa buraxılmışdılar. Dekabrın 8-də isə Zahidov qardaşları yenidən cəza çəkdikləri müəssisələrə qaytarılıblar.