Prosesdə Elçin Sadıqov vəsatət qaldıraraq, Təhsil Nazirliyinin 591 saylı 11 oktyabr 1994-cü il tarixli “Aali məktəblərin kurs imtahanları barədə” əsasnaməsinin Konstitusiyaya uyğunluğunun yoxlanılması üçün Konstitusiya Məhkəməsinə sorğu göndərilməsi barədə vəsatət qaldırıb.
Qarşı tərəfin vəkili İlqar Cavadov bildirib ki, bu vəsatət apellyasiya instansiyası zamanı qaldırılsa da təmin edilməyib. O həmçinin “Dalğa” Gənclər Hərəkatının proses keçirilən ərəfədə məhkəmənin qarşısında keçirdikləri aksiyanı məhkəmənin gedişatına maneçilik cəhdi kimi dəyərləndirdiyini ifadə edib.
Məhkəmə yerindəcə müşavirə edərək, iddiaçının vəsatətinin təmin edilmədiyini bildirib.
Elçin Sadıqov çıxışında kassasiya şikayətinin təmin edilməsini və işə yenidən baxılması üçün ilkin instansiya məhkəməsinə qaytarılmasını məhkəmədən xahiş edib.
Müşavirədən qayıdan hakim Akif İsgəndərov kassasiya şikayətinin təmin edilməməsi barədə qərarını elan edib.
Xatırladaq ki, “Yeni müsavat” qəzetinin əməkdaşı Elmin Bədəlov 19 yanvar 2010-cu ildə Azərbaycan Dövlət Neft Akademiyasından dan xaric olunub. O, 12 noyabr 2009-cu il tarixdə təhsil müəssisəsindəki rüşvət halları və maliyyə fırıldaqları ilə bağlı pia.az saytında “Azərbaycan Dövlət Neft Akademiyasından reportaj” adlı məqalə yazdıqdan sonra təzyiqə məruz qaldığını bildirir və imtahanlardan qərəz nəticəsində kəsildiyini iddia edir. Pozulmuş təhsil hüququnun bərpa edilməsi üçün Nəsimi rayon Məhkəməsində Azərbaycan Dövlət Neft Akademiyasına və rektor Siyavuş Qarayevə qarşı iddia qaldırsa da, 05 aprel 2010-cu ildə iddianın təmin edilməməsi ilə bağlı qərar çıxarılıb. 2 iyul 2010-cu il tarixində Bakı Apellyasiya Məhkəməsi Nəsimi rayon Məhkəməsinin 5 aprel 2010-cu il tarixli qərarının qüvvədə saxlayaraq, şikayəti təmin etməyib.