Bu gün (24 iyun) Sumqayıt Apellyasiya Məhkəməsində hakim Vidadi Cəfərovun sədrliyi ilə Abşeron rayon Ceyranbatan qəsəbəsinin bir qrup sakininin – İdris Zeynalov və İmran Novruzovun Cinayət Məcəlləsinin 127-ci (qəsdən sağlamlığa az ağır zərər vurma) və 221-ci (xuliqanlıq) maddələri ilə “Güzgü” qəzetinin müxbiri Kamran Bəyəliyevə (Səxavət) qarşı irəli sürdükləri ittiham üzrə Qubadlı rayon Məhkəməsinin 02 noyabr 2010-cu il tarixli qərarından verdiyi apellyasiya şikayəti üzrə məhkəmə prosesi keçirilib. Bu barədə Reportyorların Azadlıq və Təhlükəsizlik İnstitutuna (RATİ) K.Bəyəliyevin özü məlumat verib.
Proses dövlət ittihamçısının çıxışı ilə başlayıb. Dövlət ittihamçısı T. Yusifov Qubadlı rayon Məhkəməsinin çıxardığı hökmün dəyişdirilmədən qüvvədə saxlanılmasını məhkəmədən xahiş edib.
Daha sonra çıxış edən müdafiə tərəfi dövlət ittihamçısına etiraz elədilər. Vəkil V. Xasayev Bəyəliyevə jurnalist fəaliyyətinə görə böhtan atıldığını və ilkin instansiya məhkəməsinin qərarının ləğv edilərək, ona bəraət verilməsini hakimdən xahiş edib.
Müşavirədən qayıdan hakim V. Cəfərov K. Səxavətə (Bəyəliyev) qarşı irəli sürülmüş 221-ci (xuliqanlıq) maddənin sübuta yetirilmədiyi üçün onun üzərindən götürülməsi və cəmi 100 manat cərimə edilməsi barədə qərar elan edib
K. Bəyəliyev bu qəradan Ali Məhkəməyə şikayət veriləcəyini bildirdi.
Xatırladaq ki, 2009-cu il sentyabr ayının 11-də axşam saat 11 radələrində “Güzgü” qəzetinin müxbiri Kamran Bəyəliyev ilə Ceyranbatan qəsəbəsinin girişində Bakı-Sumqayıt magistral yolun üstündə Sabir Qafarova məxsus kafeni icarəyə götürmüş İdris Zeynalov və İmran Novruzov arasında mübahisə yaranıb. Mübahisə icarədarların K.Bəyəliyevdən işlətdikləri kafe barədə yazıları dayandırmağı tələb etmələri ilə başlanıb. Baş verən hadisə ilə bağlı K.Bəyəliyev haqqında məhkəməyə şikayət edilmişdi. Məhkəmə Bəyəliyev barədə 1 il müddətinə şərti həbs cəzası hökmü çıxarmışdı.
“Güzgü” qəzeti 1992-ci il iyul ayının 22-dən ayda 1 və ya 2 dəfə çap olunan iqtidaryönlü satirik nəşrdir.