KEÇMİŞ NAMİZƏDƏ QARŞI 3 NƏFƏR XÜSUSİ İTTİHAM QAYDASINDA İDDİA İRƏLİ SÜRÜB

    Dekabrın 3-də Yasamal Rayon Məhkəməsində deputatlığa keçmiş namizəd Fuad Qəhrəmanlıya qarşı ayrı-ayrı şəxslər tərəfindən xüsusi ittiham qaydasında 3  şikayət verilib.

İlk olaraq  Yasamal Rayon Məhkəməsində hakim Sərdar Mehrəliyevin sədrliyi ilə Müasir Müsavat Partiyasının sədri Hafiz Hacıyevin Fuad Qəhrəmanova qarşı xüsusi ittiham qaydasında şikayətinə əsasən məhkəmə prosesi olub. Hakim Sərdar Mehrəliyev bildirib ki, Seçki Məcəlləsinə əsasən şəxs  baş prokurorluğun  razılığı olmadan, namizəd kimi qeydə alındıqdan sonra törətdiyi əməllərə görə cinayət məsuliyyətinə cəlb edilə bilməz, tutula bilməz, məhkəmə qaydasında müəyyənləşdirilən inzibati tənbeh tədbirlərinə məruz qala bilməz. Buna görə də hakim bildirib bu işlə bağlı Baş Prokurorluğa müraciət göndərilsin və proses 10 dekabr  saat   11:30- a təyin edilsin.

            Digər proses isə hakim Xəqani Tağıyevin sədrliyi ilə deputat Hüseynbala Mirələmovun Fuad Qəhrəmanova qarşı xüsusi ittiham qaydasında şikayətinə baxılıb. Bu prosesdə də hakim eyni məzmunla Baş Prokurorluğa müraciət edilməsini məsləhət bilib. Bu səbəbdən də hakim prosesi 10 dekabr saat 12:00- a təyin edib.

            Üçüncü proses hakim Tahir İsmayılovun sədrliyi ilə YAP- ın keçmiş deputatı Əhəd Abıyevin Fuad Qəhrəmanova qarşı xüsusi ittiham qaydasına şikayətə əsasən proses keçirilib. Bu proses də eyni səbəbdən 10 dekabr saat 12:30-a təyin edilib.

Bütün iddiaçılar Fuad Qəhrəmanlının Cinayət Məcəlləsinin 148-ci (təhqir) maddəsi ilə məhkum olunmasını istəyirlər.

             Qeyd edək ki, proseslərdə xüsusi ittihamçılar iştirak etməyiblər.