ABŞ-ı Helsinki Komissiyasının sədri, konqresmen Alsi Hastinqs və komissiyanın həmsədri Bencamin Kardin Beynəlxalq Mətbuat Azadlığı Günü ilə dünyada söz azadlığın vəziyyətinə dair bəyanat yayıblar.
Təşkilatın rəsmi internet saytında yerləşdirilən bəyanatın Azərbaycana aid olan hissəsində deyilir ki, ATƏT-in media azadlığı üzrə nümayəndəsi Mikloş Haraştinin müşahidə etdiyi kimi hazırda Azərbaycanda mediaya edilən təzyiqlər xüsusi narahatlıq doğurur:
“Azadlıq” qəzetinin müxbiri Aqil Xəlilin bıçaqlanması hadisəsi jurnalistlərə qarşı hücumlardan yalnız biridir. 2007-ci ilin dekabr ayında 5 nəfər jurnalistin azad olunmasına baxmayaraq yenə də başqa media nümayəndələri hələ də həbsdədir. Biz Azərbaycan rəhbərliyini jurnalistlərə qarşı olan hücumları araşdırmağa və günahkarları cəzalandırmağa, eyni zamanda diffamasiya və təhqirə görə cinayət məsuliyyətini ləğv etməyə, həbsdəki jurnalistləri azadlığa buraxmağa çağırırıq”, – deyə bəyanatda bildirilir.