Noyabrın 26-da “Azadlıq” qəzetinin reportyoru Ramin Deko Yasamal rayon məhkəmə qərarlarının icrası şöbəsinə çağırılıb. Bu barədə bu gün (27 noyabr) Reportyorların Azadlıq və Təhlükəsizlik İnstitutuna (RATİ) Ramin Deko məlumat verib.
R. Deko bildirib ki, ondan 10 gün ərzində 2 min manat cəriməni ödəməyini tələb ediblər.
“Bu cərimə “Binə” ticarət mərkəzinin rəhbəri Kəbirə Məmmədovanın iddiası üzrə çıxarılmışdı. Mən icraçılara bu qədər pulumun olmadığını və 10 gün ərzində bu pulu ödəmək imkanından məhrum olduğumu bildirdim. Mən onlara bildirdim ki, iki aydır “Azadlıq” qəzetinin bank hesabına həbs qoyulduğu üçün maaş ala bilmirəm ”,-deyə jurnalist qeyd edib.
Xatırladaq ki, 22 oktyabr 2012-ci ildə Yasamal rayon Məhkəməsi Binə Ticarət Mərkəzinin sahibi Kəbirə Məmmədovanın iddiasını təmin edərək, “Azadlıq” qəzetini 30 min manat, qəzetin müxbirini isə 2 min manat cərimə etmişdir. Kəbirə Məmmədova “Azadlıq” qəzetində Ramin Dekonun Avroviziya ilə bağlı dərc olunmuş məqaləsinə görə məhkəməyə müraciət etmişdir. Məqalədə Azərbaycanda keçirilən “Avroviziya 2012” musiqi yarışmasına görə Binə Ticarət Mərkəzində sahibkarlardan pul yığılması iddia olunurdu.