Bu gün “Ambasador” oteldə Almaniyanın Fridrix Ebert Fondu və Azərbaycanın Gənclər Klubu İctimai Birliyi “Azərbaycanda İnsan Haqlarının mövcud vəziyyəti: problemlər və beynəlxalq standartlar” mövzusunda konfrans keçirib.
Konfransda ölkədə insan hüquqları sahəsində vəziyyətin gərgin olduğu vurğulanıb. Çıxış edənlər ifadə azadlığı, azad seçki, toplaşmaq, mülkiyyət hüququ sahəsində vəziyyətin xüsusilə ağır olduğunu bildirib.
“Ən ağır vəziyyət ifadə azadlığı sahəsindədir. Düz söz danışanlar ya həbs edilir, ya da narkotik ittihamı ilə üzləşir. Elmar Hüseynovun qətli, Eynulla Fətullayev və blogerlərin həbsi mediada daxili senzura amilini daha da gücləndirib” , – deyə tədbirdəki çıxışında Reportyorların Azadlıq və Təhlükəsizlik İnstitutunun direktoru Emin Hüseynov qeyd edib.
Forumda bu il keçirilən parlament seçkilər Azərbaycanın son 30 illik tarixində ən total saxtakarlıqlar edilmiş seçki kimi xarakterizə edilib. “Hətta ötən əsrin 90-cı illərindəki yenidənqurma dövründəki seçkilərdəki plüralizmi Azərbaycandakı 2010-cu il parlament seçkilərində müşahidə edilmədi. O dövrdə sərbəst toplaşmaq hüququnu reallaşdırmaq imkanları mövcud idi, amma 2010-cu il Azərbaycanında bu da mümkün deyil”, – deyə Müsavat Partiyası Aparat Rəhbəri Arif Hacılı qeyd edib.
Tədbirdə ölkədə mülkiyyət hüququnun pozulma hallarının kütləvi hal aldığı qeyd edilib. Natiqlər mülkiyyət hüququnun pozulma hallarının bundan sonra daha da çoxalacağını proqnozlaşdırır. Belə ki, dünya bazarında neftin qiymətinin artması bu amili daha da artırır. “Azərbaycanda vəhşi məmur kapitalizmi dövrüdür. İnsanların mülkiyyəti, evləri, hətta əmlakı zorla əlindən alınır. Demokratiya insanların mülkiyyət hüququndan başlanır. Mülkiyyət hüququ isə azad seçim hüququndan asılıdır. Azad seçki hüququ təmin edilməyən ölkədə mülkiyyət hüququ yoxdur”, – deyə İqtisadi Təşəbbüslərə Yardım Mərkəzinin rəhbəri Azər Mehdiyev bildirib.
“Ölkədə insanların şikayətləri araşdırılmır. Məhkəmələr şikayətlərə hüquqi qiymət vermir. Məhkəmələr daha çox sifarişləri yerinə yetirir. Azərbaycan hətta Avropa İnsan Haqları Məhkəməsinin qərarlarına məhəl qoymur” – deyə çıxışında hüquqşünas Rəsul Cəfərov qeyd edib.
Tədbirdə politoloq Ərəstun Oruclu beynəlxalq təşkilatlar, o cümlədən Avropa Şurası, ATƏT-in Azərbaycandakı fəaliyyəti, Avropa Birliyinə daxil olan bir sıra ölkələrin Bakıdakı səfirliklərinin ünvanına da sərt tənqidlər səsləndirib. O, Avropa Birliyinə daxil olan bəzi ölkələrin Bakıdakı səfirliklərinin fəaliyyəti dövründə insan hüquqlarının qorunması sahəsində heç bir fəaliyyətlə məşğul olmadıqlarını iddia edib.
İqtisadçı ekspert Natiq Cəfərli isə bildirib ki, uzunmüddətli sabitliyin təminatı demokratiya, insan haqları və mülkiyyət hüququnun təminatından keçir.
Müsavat Partiyasının başqanı İsa Qəmbər insan haqlarının pozulmasının əsas günahkarının Əliyev iqtidarının olduğunu bildirib. O eyni zamanda regionda demokratiyanın və insan haqlarının təmin olunmamağında Moskvanı da günahlandırıb. “Rusiyadakı avtoritar rejim MDB-də avtoritar rejimlər ittifaqı yaradıb və bütün demokratik dəyərli standartları məhv edirlər”, – deyə o qeyd edib.
Habelə Müsavat başqanı Azərbaycan hüquq müdafiəçilərini Wikileaks
saytının sahibi Culian Assancın hüquqlarının müdafiəsinə çağırıb. “Culian Assancı da Azərbaycanın “Azadlıq” qəzetinin redaktoru Qənimət Zahidin gününə salırlarsa, buna nə ad vermək olar. İnsan hüquqları qurumları onun müdafiəsini təşkil etməlidir” – deyə o qeyd edib.
Fotolar: http://www.irfs.az/component/option,com_datsogallery/Itemid,30/func,viewcategory/catid,681/lang,az/