Aprelin 20-də “Realniy Azerbaydjan” və “Gündəlik Azərbaycan” qəzetlərinin baş redaktoru, məhbus jurnalist Eynulla Fətullayevin həbsinin 4 ili tamam oldu. İki gün sonra isə Avropa İnsan Haqları Məhkəməsinin onun dərhal azad edilməsi barədə qərarından 1 il ötür. Lakin Eynulla hələ də həbsdədir.
Xatırladaq ki, bir müddət əvvəl Eynulla Fətullayev vəkili vasitəsilə bəyan etmişdi ki, aprelin 20-də həbsinin “yubiley” günü ilə bağlı bir günlük aclıq aksiyası keçirmək niyyətindədir. E.Fətullayevin son dövrlər olduqca gərgin, əziyyətli günlər yaşadığını nəzərə alan həmkarları isə ona müraciət edərək, bu addımı atmamağı xahiş etmişdilər və indi onlar özləri həmin tarixi aclıq aksiyası ilə qeyd etmək istəyirlər.
Aksiyaya Mehman Əliyev, Rauf Arifoğlu, Qənimət Zahid, Rövşən Hacıyev, Elnur Astanbəyli, Şahvələd Çobanoğlu, Zamin Hacı, İdrak Abbasov, Famil Cəfərli, Elmin Həsənli, Natiq Ədilov, Elşad Qocayev, Sücəddin Şərifov, Ramin Deko, Gültəkin Knyazqızı, Nemət Hüseynli, Aynur Elgünəş, Tatyana Kryuçkina, Natiq Cavadlı, Elşən Balaxanılı, Samir Kazımlı və digərləri qoşulub.
Xatırladaq ki, Eynulla Fətullayev 2007-ci ildə terrorla hədələmə və digər ittihamlarla 8 il 6 ay müddətinə azadlıqdan məhrumetmə cəzasına məhkum edilib. Lakin Avropa İnsan Hüquqları Məhkəməsi isə 2010-cu il aprelin 22-də yuxarıda qeyd edilən cinayət işləri ilə bağlı qərar qəbul etmişdi. Qərarda bildirilir ki, jurnalist dərhal azadlığa buraxılmalı və Azərbaycan dövləti ona 27 min 822 avro məbləğində təzminat ödəməlidir. Ali Məhkəmənin Plenumu isə bu qərarı qismən təmin edib.