“Azadlıq” radiosunun “azadliq.org” internet ünvanına Azərbaycanda fəaliyyət göstərən bir neçə internet provayderindən giriş məhdudlaşdırılıb. Bu barədə “Facebook” sosial şəbəkəsində yayılan məlumatda bildirilir ki, mart ayının 6-da saat 15.00-dan etibarən 5 provayderdən – “Bakinternet”, “Azeronline”, “Uninet”, Ultel və “Connect” provayderlərindən “Azadlıq” radiosunun saytına girişə məhdudiyyət qoyulub.
Qeyd edək ki, “Azadlıq” radiosu ABŞ-da dərc olunan “The Washington Post” qəzetində dərc olunmuş məqaləyə istinadən Azərbaycan prezidenti İlham Əliyevin övladlarının adına Dubayda 75 milyon dollarlıq mülk olması barədə martın 5-də material hazırlayıb. Bundan 1 gün sonra isə “Azadlıq” radiostansiyasının internet ünvanına 5 internet provayderindən məhdudiyyət qoyulmasının məhz həmin məqalə ilə əlaqədar olması da istisna olunmur.
Reportyorların Azadlıq və Təhlükəsizlik İnstitutunun (RATİ) araşdırmaları nəticəsində məlum olub ki, bu gün (08 mart) saat 15.30-dan etibarən “Adanet” provayderindən də “azadliq.org” saytına giriş məhdudlaşdırılıb.
RATİ məsələ ilə əlaqədar adıçəkilən provayderlərin rəhbərliyinə, həmçinin Rabitə və İnformasiya Texnologiyaları Nazirliyinə və “Aztelekom” istehsalat birliyinə sorğu ilə müraciət edib.