“Olaylar” İnformasiya Agentliyi və “Bizim Yol” qəzeti “ZQAN Holding” şirkətlər qrupunun Direktorlar Şurasının sədri, nəqliyyat naziri Ziya Məmmədovun oğlu Anar Məmmədovdan üzr istəyib.
Bu barədə bu gün (6 avqust) Reportyorların Azadlıq və Təhlükəsizlik İnstitutuna (RATİ) “Bizim Yol” qəzetinin redaktoru Tural Talehoğlu məlumat verib.
T. Talehoğlunun sözlərinə görə, bu xəbər yeni deyil və təkzib bir müddət bundan əvvəl verilib: “İyunun 6-da “Bizim Yol” qəzeti tələbə əsasən “Təkzib” başlığı altında üzr istəyərək müvafiq məlumat dərc edib”, – deyə o bildirib.
Qeyd edək ki, “Olaylar” İnformasiya Agentliyi və “Bizim Yol” qəzeti “Yevlax Avtovağzal” ASC ilə bağlı yazdıqları yanlış yazılarına görə üzr istəyiblər. Həmçinin “Olaylar” İnformasiya Agentliyi 2 avqust 2012-ci il tarixində Yasamal rayon məhkəməsində keçirilən prosesdə qəzet iddiaçının tələbini icra edərək, “Təkzib” başlığı altında Anar Məmmədovdan üzr istənilməsi barədə yazının dərc olunduğu "Olaylar" qəzetinin 21-30 iyul nömrəsini təqdim edib.