Bu gün (28 mart) Sumqayıt şəhər Məhkəməsində hakim Təhminə Xəlilovanın sədrliyi ilə AXCP Gənclər Komitəsinin üzvü, gənc fəal Cabbar Savalanlının işi üzrə müdafiə tərəfin alternativ ekspertizadan keçməsi barədə qaldırdığı vəsatətə əsasən qapalı məhkəmə prosesi keçirilib.
Prosesdən sonra gənc fəalın vəkilləri Əssabəli Mustafayev və Anar Qasımov verdikləri vəsatətin təmin edilmədiyini və bu qərardan apellyasiya şikayəti verəcəklərini bildiriblər.
Qeyd edək ki, gənc fəal Cabbar Savalanlının vəkilləri Narkoloji Dispanserin ziddiyyətli rəyindən Savalanlının əleyhinə istifadə oluna biləcəyini əsas gətirərək, istintaqın rədd etdiyi alternativ, həmçinin təkrar ekspertizanın keçirilməsi, Narkoloji Dispanserin rəy verən həkimlərinin istintaqda şahid kimi dindirilməsi barədə vəsatət qaldırmışdılar.
Belə ki, ekspertiza Savalanın narkotikadan fiziki və psixoloji asılılığını müəyyən etməyib və onun icbari müalicəyə ehtiyacı yoxdur. Bununla yanaşı, ekspertlər gəncin narkotik maddədən istifadə etməsinin mümkünlüyünü istisna etməyiblər.
Xatırladaq ki, Cabbar Savalanlı fevralın 5-də qanunsuz narkotik saxlamaq ittihamı ilə həbs edilib. Cabbar Savalanlıya Cinayət Məcəlləsinin 234.1-ci maddəsi ilə (satış məqsədi olmadan qanunsuz olaraq narkotik vasitələri və ya psixotrop maddələri şəxsi istehlak miqdarından artıq miqdarda əldə etmə və ya saxlama) cinayət işi açılıb. Lakin onun sosial şəbəkələrdə iqtidar əleyhinə səsləndirdiyi fikirlərə görə həbs olunmağı istisna edilmir.