Bu gün (10 may) səhər saat 11.00 radələrində Fəxri Xiyabanda Azərbaycan prezidenti İlham Əliyev başda olmaqla hökumət rəhbərlərinin eks-prezident Heydər Əliyevin qəbirüstü abidəsini ziyarət edərkən APA informasiya agentliyinin xüsusi müxbiri Elbrus Seyfullayev polis zorakılığı ilə üzləşib.
Hadisə yerində olan mənbənin RATİ-yə verdiyi məlumata görə, jurnalist ziyarət mərasimindən reportaj hazırlayırmış, amma polis ona mane olub. Polisin qeyri-qanuni hərəkətlərinə etiraz etdikdə isə hüquq mühafizə orqanları əməkdaşları jurnalisti hadisə yerindən döyə-döyə və ünvanına təhqiredici ifadələr işlətməklə uzaqlaşdırıblar.
Daha sonra 28-ci Polis Bölməsinə aparılan jurnalist orada təxminən 40 dəqiqə qeyri-qanuni saxlanılıb və daha sonra azad edilib.
APA-nın baş direktoru Vüsalə Mahirqızı RATİ-nin əməkdaşı ilə söhbətində həqiqətən də jurnalistin Polis Bölməsinə aparıldığını desə də, onun döyülüb – döyülməməsi ilə bağlı məlumatı nə təsdiq nə də təkzib etdi: “Anlaşılmazlıq olub və baş verənlərlə bağlı artıq üzrxahlıq da ediblər”, – deyə vurğulayan Mahirqızı baş vermiş insidentlə bağlı şikayətçi olmadıqlarını da bildirdi.
Təzyiqə məruz qalmış Seyfullayev də RATİ-nin əməkdaşı ilə söhbətində təxminən Mahirqızının dediklərini təkrarladı və təzyiqə məruz qalmasını yaranmış anlaşılmazlıqla əlaqələndirdi.
Qeyd edək ki, bu gün Bakıda Azərbaycanın eks-prezidenti, hazırda prezident olan İlham Əliyevin atası Heydər Əliyevin anadan olmasının 85 illiyi, habelə Gül Bayramı təntənəli şəkildə qeyd edilir.