Bu gün (6 iyun) Bakı Apellyasiya Məhkəməsində hakim Qail Məmmədovun sədrliyi ilə “Bizim Yol” qəzetinin əməkdaşı Ramid İbrahimovun Səbail rayon Polis İdarəsinin 9-cu polis bölməsinin təhqiqatçısı Fazil Mahmudova qarşı iddiası üzrə Səbail rayon Məhkəməsinin 27 may 2011-ci il tarixli qərarından verdiyi apellyasiya şikayətinə əsasən məhkəmə prosesi keçirildi.
Hakim Q. Məmmədov Səbail rayon Məhkəməsinin qərarının dəyişdirilmədən qüvvədə saxlanılması barədə qərar elan edib. Bu barədə Reportyorların Azadlıq və Təhlükəsizlik İnstitutuna (RATİ) R. İbrahimovun özü məlumat verib.
Xatırladaq ki, “Bizim Yol” qəzetinin əməkdaşı Ramid İbrahimov fevralın 12-də Prezident Administrasiyasının qarşısında keçirilən etiraz aksiyasından reportaj hazırlayarkən mülki geyimli şəxslər tərəfindən fiziki hücuma məruz qalması ilə bağlı Səbail rayon Polis İdarəsinin 9-cu polis bölməsinə şikayət edib. Lakin bölmədə onun şikayəti araşdırılmayıb. Təhqiqatçı Fazil Mahmudovun qərarı ilə cinayət işinin başlanmasının rədd edilməsi barədə qərar çıxarıb. Jurnalist həmin qərardan şikayət verib.
“Bizim Yol” qəzeti 2003-cü ildən çıxır, hazırda gündəlik Azərbaycan dilində nəşr olunur.