Tərəfsiz (Parlament) Jurnalistlər Birliyinin təşəbbüsü ilə informasiya-xəbər portalı kimi nəzərdə tutularaq yaradılmış “modern.az” saytı fəaliyyətini dayandırır. Bu barədə bu gün (06 iyun) Reportyorların Azadlıq və Təhlükəsizlik İnstitutuna (RATİ) PJB-nin sədri Elşad Eyvazlı məlumat verib.
Onun sözlərinə görə, KİV-də parlament-cəmiyyət münasibətlərinin səmərəli əməkdaşlığının yaradılması və peşəkar media prinsipləri ilə yeni media texnologiyalarının tətbiqinə dəstək kimi nəzərdə tutulmuş “modern.az” xəbər portalı 2011-ci ilin iyun ayının sonundan fəaliyyətini dayandırmaq niyyətindədir.
“Bildiyiniz kimi, “modern.az” saytı KİV-lə parlament – cəmiyyət arasında əməkdaşlığın yaradılmasına yönəldilən, eləcə də media ilə sıx şəklidə işləyən internet qəzeti idi. Fəaliyyət göstərdiyi 2 il ərzində “modern.az” ilk dəfə olaraq Milli Məclisin fəaliyyəti ilə bağlı sistemli şəkildə informasiyalar yayır və oxucular arasında parlamentin fəaliyyətini aydın və şəffaf şəkildə işıqlandıran etibarlı portal olmuşdu. Sayt bir qrup fədakar media nümayəndələrinin dəstəyi ilə fəaliyyət göstərsə də, maliyyə çatışmazlığı səbəbindən indi fəaliyyətini dayandırmaq məcburiyyətindədir”, – deyə E. Eyvazlı vurğulayıb.