Bu gün (21 fevral) Sumqayıt Apellyasiya Məhkəməsində hakim Vidadi Cəfərovun və İlham Həsənovun sədrliyi ilə Abşeron rayon Ceyranbatan qəsəbəsinin bir qrup sakininin – İdris Zeynalov və İmran Novruzovun Cinayət Məcəlləsinin 127-ci (qəsdən sağlamlığa az ağır zərər vurma) və 221-ci (xuliqanlıq) maddələri ilə “Güzgü” qəzetinin müxbiri Kamran Bəyəliyevə (Kamran Səxavət) qarşı irəli sürdükləri ittiham üzrə Qubadlı rayon Məhkəməsinin 02 noyabr 2010-cu il tarixli qərarından verdiyi apellyasiya şikayəti üzrə məhkəmə prosesi keçirilib.
K.Bəyəliyevin sözlərinə görə, məhkəmədə qarşı tərəfdən İdris Zeynalov və İmran Novruzov, məhkəmə qərarından şikayətçi qismində isə özü və vəkili Vüqar Xasayev iştirak ediblər.
Prosesdə dövlət ittihamçısı Tural Yusifovun, eləcə də şahid qismində iştirak edən Muxtar Nəsibov, Sabir Qafarov, Ənvər Məlikov, Rəhim Fətəliyevin ifadələri dinlənilib.
Hakim V. Cəfərov ifadələri dinlədikdən sonra növbəti prosesi 7 mart saat 10:00-a təyin edib.
Xatırladaq ki, 2009-cu il sentyabr ayının 11-də axşam saat 11 radələrində “Güzgü” qəzetinin müxbiri Kamran Bəyəliyev ilə Ceyranbatan qəsəbəsinin girişində Bakı-Sumqayıt magistral yolun üstündə Sabir Qafarova məxsus kafeni icarəyə götürmüş İdris Zeynalov və İmran Novruzov arasında mübahisə yaranıb. Mübahisə icarədarların K.Bəyəliyevdən işlətdikləri kafe barədə yazıları dayandırmağı tələb etmələri ilə başlanıb. Baş verən hadisə ilə bağlı K.Bəyəliyev haqqında məhkəməyə şikayət edilib. Məhkəmə Bəyəliyev barədə 1 il müddətinə şərti həbs cəzası hökmü çıxarıb.
“Güzgü” qəzeti 1992-ci il iyul ayının 22-dən ayda 1 və ya 2 dəfə çap olunan iqtidaryönlü satirik nəşrdir.